Pak nunger artists nokdangba ajanga kiralongra asoshi telatetba kecha mangutsü: Karan Johar

New Delhi, September 25 (Agencies): Maharashtra Navnirman Sena (MNS)-i India nung Pakistan nunger artistes nokdangtsüla ta noktakba ajanga kiralongraba atema telangzüba mangutsü, ta Bollywood film yanglur, Karan Johar-i ashi.
Karan indang taruba film “Ae Dil Hai Mushkil” nung Pakistan nunger nüngtugu actor, Fawad Khan-ia shilem agir.
Hokolbarnü MNS-i India nungi Pakistan nunger artistes ajak toktsür oadokang, ta amokmerena metetdaktsü. Parnok moura, parnoki film nung shilem magidaktsüi mokdangtsü ta MNS-isa ashi.
Jammu & Kashmir kübok Uri nung kiralongrartemi India nunger sepai 18 tepsetba sülen MNS-i iba osang metetdaktsü.
“Asenoki jashiba aser koremba ni angateta lir, nisung taküm samaba atema nia kanga nemjema bilemtsür” ta Karan-i osangbener dang ashi.
“Pakistan nunger artistes nokdangtsü ta asüba ajanga kiralongraba khuret asoshi telatetba kecha bener marutsütsü. Nibo iba tangatetba magizüker” ta paisa shisem.
Karan-i yangluba film tem nung Pakistan nunger actor tem amshiba atema nisung aikati pa aija arur.
“Ni iba onük yimjak nung jembitsü tsübua bilemer. Ni lendong ajurutsü ama bilemer. Iba onük atema kü film tem dak tenük yoka mapa inyakra, ni kanga jashitsü kechiyong kü indang tangatetbajibo teti temeim sayua mapa inyaktsüba indang lir” ta Karan-isa shisem.
Nisung kari Karan dak alia, Shah Rukh Khan aser Bhatt’er teloktem aitsüdar. Parnoki Pakistan nunger India nung arua shilem agitsü aniokba atema aitsür.
SRK-i tang Mahira Khan den “Raees” film nung shilem tagidak lir aser külen Bhatt’er kibongi tesüiba mapang Pakistan nungi actor tem anioka film tem nung shilem agiogo.