Pak nunger kiralongrar Naved yarir nisung ana puogo

Srinagar, August 08 (Agencies): August 05 nü Jammu & Kashmir, Udahampur nung apusang Pakistan nunger kiralongrar Naved Yakub (Usman) yarir nisung ana tanü National Investigation Agency (NIA)-i puogo.
Iba den külemi Lashker-e-Toiba kiralongrar Javed yariba ken o nung temelung melemi nisung asem police-i sota lir.
Tanü National Investigation Agency (NIA)-i Javed Jammu nungi Kashmir Valley-i anir aruba sülen ghonda ishika tsüngda item nisungtem puogo.
“Usman-i nangzükba nung ajemdaker NIA-i pa Pulwama aser Kulgam district nati anir ao. Aibelensangi ashiba o nung ajemdaker maneni ano nisung kar aputsüa akok,” ta tanü police ketdangser kati Srinagar nung osangbenertem dang ashi.
Pakistan, Faislabad nungi arishi küm 23 Usman dang asüngdangyaba sülen pa o nung ajemdaker NIA-i nisung 12 dak tema dang asüngdangyaa liasü.
August 5, 2015 anepdang Udhampur district nung aliba Jammu-Srinagar highway nung Usman densema kiralongrartemi Border Security Force (BSF) sepai ana kahset aser 11 yiruja liasü, iba sülen yimtsüng ka nung alirtemi Usman apu.
Tang tashi nung nisung ana puogo. Tena rongnung ka truck anir ka, shibai kiralongrartemji Kulgam nungi Udhampur nung aliba Samroli-i anir oa liasü aser tanabuba nisungbaji Pulwama nung amtsük yangluba dokan kibur ka lir, aser paji Lashker-e-Toiba atema tema nung inyaker, ta osang ka ajanga ashi.
Ano tang police-i sota aliba nisung asem dang Interrogation centre balala nung asüngdangyadagi, aser parnokjia aputsüa akok, ta kasa osang ajanga ashi.
Union Home ministry tetuyuba nung NIA-i iba ken o bushisüngdangdagi.
Tang Usman anema Unlawful Activities (Prevention) Act, Arms Act aser Indian Penal Code kübok section balala nung ken o ka benoka lir.
Asüngdangyaba mapang Usman-i ashiba agi, pa Tangmarg aser Baba Reshi nung amungba sülen South Kashmir nung aliba Awantipura-Pulwama-i ao aser tenemtsüng ka nung aliba lungpok ka nung mapang tatsüka liasü.
Maneni NIA-i Jammu & Kashmir densema India nung LeT kiralograr telok inyakyim telungi ia bushisüngdangtsü meranger.