Pak nungeri Indian Military Installations amaktsü merang: MEA

New Delhi, February 27 (Agencies): Yashi Indian Air Force (IAF)-i LoC adener Pakistan nung aliba kiralongrar telok JeM indang training camp amakba sülen tanü Pakistan nungeri Indian military installations amaktsü merang, ta India-i metetdaktsü.
IAF-i Pakistan nunger tayimtsü ka kahzüka yok, aser India nungera IAF MiG 21 Bison tayimtsü ka den pilot ka samaogo, ta parnokisa metetdaktsü.
Sangdong ka ajanga External Affairs Ministry otongdar, Raveesh Kumar aser Air Vice Marshal, R G K Kapoor nati, Pakistan-i India nunger pilot ka pua lir, ta jembiba osangji onoki jangjatsü merangdar, ta metetdaktsü.
Yashinep Indian Air Force-i Pakistan nung amenoka aliba Jaish-e-Mohammed (JeM) kiralongrartem indang training camp amakba sülen JeM-i kiralongratsü sentong aliba India-i lazük.
Februay 14 nü Pulwama nung CRPF sepai amakdang sepai 40 tepsetbaji JeM-i inyak, ta parnok sasa nangzük.
MEA otongdar Kumar-isa, “India-i kiralongra anema inyakba meyipja tanep Pakistan-i parnok indang Air Force amshia India nunger military installations amaktsü merang. Asenok kanga kümküma aliba aser renema aliba ajanga Pakistan sentong raksatsüogo,” ta metetdaktsü.
Pai ashiba agi, Pakistan Air Force asalentongji lazük, aser idangyongji Indian Air Force-i meyiptsüogo.
“Anüng nung raraba mapang nung Indian Air Force indang MiG 21 Bison kati Pakistan nunger Air Force fighter tayimtsü ka kahzük. Pakistan nunger tayimtsüji anünglen nungi Pakistan tsütsüleni tsükba ali nung alir sepaitemi angu. Iba rara nung asenoka tia makai MiG 21 tayimtsü ka sama. Iba tayimtsü nung mena alisang pilot samaogo. Pakistan-ibo pilot ji parnok ket nung lir ta shiogo. Onoki iba osangji jangjatsü merangdar,” ta paisa metetdaktsü.
Ajisüaka ketdangser anapronglai osangbenertem dang tasüngdangba memeshi.
India nunger ketdangsertemi sangdong agutsüba sülen kobi melii Pakistan Ato kilonser, Imran Khan-i TV ajanga jembidang, nuclear aliba kidanger linük ana (India-Pakistan) tsüngda ken o jembiba ajanga onüktem bentettsü ayongzük.
Ajisüaka Khan-i, India nunger MIGs tayimtsü anati Line of Control (LoC) adena ait, aser tayimtsü anaprongji kahzükogo, ta ashi.
“Nenoki ozü linüki arutetra onokia kasaji inyaktettsü, ta kuli sayutsü nükjidong nung onoki ibaji inyak. Parnok (India) indang MiGs tayimtsü ana kahzüka yok,” ta Khan-i metetdaktsü.
Rara ajunga ya junga masadangba ajanga lir, aser ibaji ajanga kechi ajurutsüar shingaia memetet, anungji linük anati junga shisadangtsüla aser shisa kaa inyaktsüla, ta Pakistan Ato kilonserisa metetdaktsü.
Imran Khan-i, iba mapang ya linük anapronglai mitkartem nem tashi bendanga agutsütsü mapang ka masü, kechiyong ibaji ajanga nisung jenti asütsü, ta ashi.
“Ni India dang ya asüngdanger: nenok ket nung aliba raraba hadir, aser onok ket nung aliba hadir ajanga asenoki junga masadangi inyaktsü asü? Iba tensa tamajungba kümra, ni-a mazüoktettsü aser Narendra Modi (Ato kilonser)-ia mazüoktettsü,” ta pai ashi.
“Asenok külemi mener ken o jembiba ajanga iba tensa bentetdi,” ta paisa ashi.
MEA-i sangdong magutsüdang Pakistan Army-i second 46 indang video ka sayar liasü, aser iba video nungji tenük nembangtsür aliba nisung kati, paji IAF nung Wing Commander Abhinandan lir, ta ashir.
“Ni IAF officer ka lir. Kü service No ji 27981 lir,” ta nisungba jagi ashir.
Tanü item tatalokba sülen Pakistan-i parnok indang airspace shibangogo aser India-ia India north tsütsü tesem aika nung civilian air traffic shibangogo.