Pak nungi kiralongrar 15-20 shi Punjab telungi aitogo

New Delhi, September 28 (Agencies): Intelligence osang ajanga kiralongrar 15 nungi 20 shi Punjab telungi aita state, Delhi aser linük nung tanga tesemtem nung kiralongraba mapa inyaktsü akok ta melung melemi bilemdagi.

Osang ajanga ashiba agi, iba telokji Pakistan nunger itangiter agency, Inter-Services Intelligence (ISI)-i training agidaktsüogo. India-i bushia aliba kiralongrar tetsüdi Hafiz Saeed teteyuba nung kiralongrar telok nemji Pakistan occupied Kashmir (PoK) aser Pakistan nung raraba osettem amshitsü training agütsüogo.

Intelligence osang ajangasa, ISI ketdangsertemi PoK nung Pakistan nung amenoka aliba kiralongrar teloktem- Lashkar-e-Toiba, Jaish-e-Mohammed, Hizbul Mujahideen aser Sikh kiralongrar telok Babbar Khalsa International aser Khalistan Zindabad Force den senden mena kiralongraba sentong yangluogo, ta ashi.

ISI-i parnok nem senotsü agütsüogo aser parnok den amalitep akhangshitsü asoshi metetdaktsüogo.

Sikh kiralongrar teloktemia iba sentong nungji tongtibang shilem ka agiogo, kechiyong parnoki kiralongrartem dang Sikh sobaliba aser gurmukhi script sayuogo, iba den külemi Khalistan Zindabad Force tongti lenir Ranjeet Singh-i acha ayanga ita ana tashi Gurudwara Kartarpur Sahib nung training agiba nguogo, ta kasa osang ajanga ashi.

Par telokisa kiralongrartem dang Punjab litsü indang metetdaktsüogo. Kiralongrar telokji Punjab telnungi aitogo mesüra kobi melii aittsü, ta osang ajangasa ashi.

Kiralongraba mapa inyaktsü atemaji injang aser raraba osettem Jammu & Kashmir nungi Punjab tashi senzüba truck garitem chassis nung miima belenogo.