Pak o Afghanistan nati border crossing tanaben lapoktsütsü lemtet

Afghanistan nungertemi anungba talongtsü nung tetsür aser tanurtemi mener Afghanistan yimtiba, Kabul anüdoklen, Torkham nung tentetba border crossing ajangdanga Pakistan-i aiba noksa nung angur. (Torkham, May 14)

Islamabad, May 14 (Agencies): Pakistan aser Afghanistan sorkar nati par arrtsülen tenteba tongti border crossing tanaben lapoktsütsü telemtetba ka agiogo.
Par linük ana tsüngda mangatettep adoka anogo 4 tashi iba border crossing shibangba ajanga senzüsenponger meyirijang jenti len tum nung anena alitsüsa küma timtem toushi jenti ajuruba osang jangjaogo.
Par linük ana tsüngda latetba arrtsü den sentakba onük benoka jembitsü asoshi Afghan Ambassador, Hazrat Omar Zakhilwal aser Pakistan mitkar lenisang, General Raheel Sharif nati senden ka amenba sülen Pakistan northwest tsütsülen tentetba Torkham border crossing-ji tanaben lapoktsütsü lemtetba osang jangjaogo.
“Ozü lenir, Zahilwal aser Sharif nati ajurutepa senden amendang linük anapronglai aroki lungjemer kiralongrar anema maneni raratsü aser ozü linük densemba region nung teti asoshi yimji yimjung tia bener arutsütsü asoshi nungdakba maparen inyaktsü nangzüktepogo,” ta Pakistan miktar otongdar, Lt. General Asim Bajwa-ia metetdaktsü.
Ozüng alema arrtsü adenertem nokdangtsü nükjidong nung Pakistan sorkari border crossing anasa atsü tasen ka atsüba ajanga Pakistan aser Afghanistan na tsüngda mangatettep adoka liasü.
Pakistan-i atsüba atsüji par lushi nung atsür ta shia, Afghan sorkari Pakistan aitsütsü tenzük saka iba atsüji Pakistan lushi telungi meter 30 shi aiter atsüba osang ka Pakistan ketdangsertemi metetdaktsüogo.
Afghanistan-i par maparen aitsüba yong Pakistan-i atsü atsütsü maparenji anena border crossing shibanga liasü.
Pakistan aser Afghanistan na tsüngda Duran Line ta ajaba kilometer 2,500 talang arrtsü lateta lir saka Britishi yimli mapang latettsüba arrtsüji Afghanistan lenirtemi agizüktsü memulungi kasaji latetshitsü asoshi onük benoka lir.
Ajisüaka, arrtsü latetshitsü onükji Pakistan-i magizükba ajanga par linük ana tsüngda mapang shia mangatettep adoka tesendaktepa mejungi akümtsüsa tia ajurur.
Pakistan-i Taliban aser Haqqani network den sentaktepba telungpurtemi Pakistan lushi nung tesep tentetba maparen menokdanger ta shia, Afghanistan-i Pakistan aija par linük ana tsüngda tesendaktep mejungi akümba mapang ka nung Torkham border crossing den sentakba mangattepbarena tan ajurur lir.
Ajisüaka, Pakistan-i yamaji meinyaker ta shia, Afghanistan-i aitsüba olenji magizüker ta Pakistan’er foreign policy lenisang, Sartaj Aziz-i metetdaktsüogo.