Pak occupied Kashmir nung meimchir temetentem mali: Rijiju

New Delhi, April 14 (Agencies): Pakistan Occupied Kashmir (PoK) nung lungkak aitba mapang ka nung tanü Union minister, Kiren Rijiju-i, iba tesem nung meimchir temetentem mali aser taoba mapang tatalokba aika ajanga ibaji jangjatsür, ta ashi.
“PoK nung meimchir temetentem mali. Tamalena iba kuli aiben nguogo,” ta yangi osangbenertem dang Minister of State for Home, Rijiju-i ashi.
Jammu and Kashmir National Students Federation (JKNSF) pusemertem den Jammu and Kashmir National Awami Party (JKNAP)-i nungita PoK tesem, Muzaffarabad nung lungkak aita liasü. Iba mapang nung parnoki Pakistan ketdangsertem aser PoK sorkari tim mesüi yimsüsür ta aija yimyim ayima liasü.
Lungkak aitertemi, mapa tazüng ajak Pakistan lanurtem nem dang agütsüba aser iba tesem nung Kashmir lanurtem sentoka inyakba mapatem aija liasü.