Pak: Okadaki Musharraf aputsü ozüng agütsür

Islamabad, April 09 (Agencies): Pakistan nung tentetba Anti-Terrorism Court (ATC)-i tesüiba Pakistan mitkar lenisan,g Pervez Musharraf aputsü ozüng tanü, Honibar nü agütsüogo.
Pakistan nung 2007 küm emergency ozüng benokba sülen superior okadak tenzüker o bendangertem pua ayuba ken o angadangtsü sentong nung Musharraf-i okadak shilem magiba yong Musharraf bail magutsüi aputsü ozüng ATC-i agütsü.
“Musharraf-i bendangleni aoba jakdang okadak nungi tamasa temelaba agitsü nungdaka liasü,” ta ATC o bendanger, Sohail Ikram-i tanü metetdaktsü.
Supreme Court (SC)-i bendanglen semdangtsü tenokdangbaren taoba March ita agienba sülen arishi küm 72 tain Musharraf-i taneptsü bushia par Pakistan toktsür Dubai bushia aoba osang jangaogo.
Sorkari melaba sülen Musharraf-i par Pakistan toktsüba olen ka Musharraf’er okatsür, Akhtar Shah-i ATC nung benoka liasü saka ATC-i iba onükji magizükba den külemi, SC-i temelaba agütsüba yong Musharrf-i Pakistan toktsü ta state prosecutor, Amir Nadeem Tabish-i metetdaktsüba osanga magizüki liasü.
ATC-i Musharraf aputsü ozüng agüjaka, iba ozüngji mapa küma meinyaktsü akok kechiyong taoba mapanga Musharraf aputsü ozüng aiben agüjaka, Musharraf asangsang nung pua ayuba osang bushiteta mali.
1999 nungi 2008 küm tashi Pakistan madak tashiyim agi yimsü asüsang, Musharraf anema 2007 küm linük temzüng anema inyakba; tesüiba Pakistan Ato Kilonser, Benazir Bhutto tepsetba aser Islamabad nung Islam tamangba yimsü lenir ka tepsetba ken o okadak benoka lir.