Pak okadaki Musharraf metentsür

Quetta, January 18 (Agencies): Pakistan nung tentetba okadak kati tesüiba Pakistan mitkar lenisang, Pervez Musharraf sorkar anemer Baloch lenir ka 2006 küm tepsetba ken o nung aibelena maliba kuli bushiteta pa tanü Hombar nü metentsüogo.

2007 küm tesüiba Pakistan lenila, Benazir Bhutto tepsetba aser Pakistan linük anema inyakba ken o densema, Musharraf anema tongti ken o 2 tashi okadak tanga benoka lir.

“Okadaki metentsüba sülen Musharraf-i pa kanga pela aliba olen ka metetdaktsüogo. Tan o bendangdang shitak agütsüba ajanga nüburtemi o bendangertem dak tamang akatsü imlar,” ta Musharraf’er okatsüria tanü metetdaktsü.

“Tanüngba ken o ana nunga pai aibelena mali ta bushiteta okadaki pa maneni metentsütsü imlaba olen ka Musharraf-i metetdaktsüogo,” ta okatsüri ashi.

Pakistan mitkartemi par mitsü sentong ka 2006 agidang Baloch lenisang, Bugti 2006 küm tepset aser pa tepsetba sülen Baluchistan province densema, Pakistan ajunga nung nüburtemi sorkar anema longkak aita liasü.

Musharraf-i 1999 küm tashiyim agi Pakistan yimsüsütsü tashi benoka 2008 küm tashi Pakistan Tir menden abenba sülen pai pasasa par Pakistan toktsür Dubai nung jenoka ali.

Pakistan general election nung candidate ka ama shilem agitsü nükjidong nung Musharraf-i 2013 küm Pakistan-i tanaben shilang saka pa iba election nung shilem magidaktsüi pa anema 2007 küm emergency ozüng benokba, opposition lenir, Bhutto tepsetba aser Bugti tepsetba ken o tem okadak benoka liasü.