Pak opposition-i PM Khan mapa nungi anentsü akhanger

Islamabad, Metsüremi/March 8 (Agencies): Mongolbarnü Pakistan opposition party pusemer meyirejang aikati Ato Kilonser Imran Khan mapa nungi anentsü khangogo aser ajita mesüra parliament nung non-confidence vote ka agitsü renema alitsü shiogo. Pai rongsenketsüng shidak achaayang masür aser srokar shidak len manir ta shia iba takhangba agütsüogo.

Pakistan People’s Party (PPP) lenisüba nung opposition campaign tenzükogo aser parnoki linük yimden yimsüsüba nung mepetmesü adoktsü ta tsübua bilemba lemsatepogo, kong yimya agi linük yimsü asütsüpur ya military-i shimmer.

“Ghonda 24 tsüngda mapa tokjang aser election nung onok den toktepang,” ta Bhutto’er jabaso aser PPP lenir Bilawal Bhutto-i linük yimtiba Islamabad nung longkak aitba sentong nung ashi.

“Mesüra no-confidence move ka atema renema liang,” ta paisa ashi.

Khan-i aniba party-i election akokba sülen pa 2018 küm Ato Kilonser aküm. Ajisüaka military teyari agia pai election akok ta pa aitsürtemi shia arudar.

Ajisüaka iba taitsüba ya Khan aser military napronglai magizük.

Opposition züngsemtem aser political analysts temi ashiba agi, PM ya military-i pu mesemi kümogo, saka Khan aser army napronglai iba ya aitsüogo.

Opposition lenirtemi ashiba agi, inflation aika akümba, sentsüh tali akümba aser foreign reserves jenjang mejungi akümba ajanga pa timtem nung aliba mapang nüburtemi pa pu mesemi kümogo.

Khan-i item taitsübatem magizük aser rongsenketzüng nung tebilemtsü aliba dak sendakba nung telangzüba agüja totzü, electricity nung jenjang ajemtsüogo aser pa mapa nungi anentsü akhangba magizük.

Opposition aser Khan party naprongla yongtsü nung mangettep adoker lir, ajisüaka opposition-i ashiba agi, no-confidence vote ka atema parnoki parliament züngsem 11 dang temulung meyipdaktsütsü nüngdaker.

Taoba küm Khan-i vote trok agi no-confidence vote kokogo. Pakistan nung taruba general election 2023 küm agitsü.