Islamabad, February 23 (Agencies): China nungi teyari sen dollar million 55 agia nüngdakba maparen inyakba sülen Pakistan parliament ki alima ajunga nung anü tashi kija amshia mapa inyakba ki mezüngbuba tanü, Mongolbar nü kümogo.
Pakistan Ato Kilonser, Nawaz Sharif-i anü tashi amshiba tanemtsü lapokja alima ajunga nung par parliament ki anü tashi kija amshia mapa inyakba ki mezüngbuba akümba temaitsü sayua liasü.
China Tir, Xi Jinping-i 2014 küm Islamabad semdangdang, Pakistan parliament ki ajunga anü tashi agi mapa inyakdaktsütsü mapatong ya tenzüka liasü.
“1947 küm linük nüchiso anguba sülen tanü mezüngsüa parliament ki ajunga nung anü tashi amshia mapa inyaktsüsa jenjang tajung angur. Pakistan sorkar nungi ajizüka, private aser public sector natia anü tashi amshitsü ayongzüker,” ta Sharif-i tanü sentong nung tayongzükba olen ka metetdaktsü.
“Tan asangsang nung parliament ki ajunga anü tashi amshia mapa inyaktettsüsa alizüng ajangzükba ya Pakistan aser China na tsüngda tesentaktep junga aliba kuli tejangja ka lir,” ta paisa shisem.
Tanü sentong nung Pakistan-i yokba China ambassador, Sun Weidong-ia shilem agia liasü.
“Parliament kidang anü tashi atsüzüktsü atema mesenlokba solar panel-i light tashi MW80 tashi atsüzüktetsü. Ajisüaka, parliament ki ajunga nung MW62 dang nüngdaker aser iba yongji, tanüngba MW18 tashiji national grid nem agütsütsü renema lir,” ta Pakistan National Assembly Speaker, Ayaz Sadiq-i osang jangjashitsü.
You must be logged in to post a comment Login