Pak PM-i Kashmiris dang India anema prangpong amshitsü ajungshir

Srinagar, September 13 (Agencies): Pakistan Ato kilonser, Imran Khan-i Kashmiri nunger dang India anema prangpong amshitsü ajungshiogo.
Imran Khan-isa, Jammu & Kashmir nung sepaitemi meimchir temeden anema inyaker ta aija India amokmeren.
Hokolbar nikongdang Pakistan occupied Kashmir (PoK) kübok Muzaffarabad nung lokti senden ka nung jembidang Imran Khan-i, Narendra Modi-i aniba sorkari Jammu & Kashmir nung Arrla 370 agienba ya International onük ka kümdaktsütsü, ta ashi.
Imran Khan-isa, alima tsüngdang pai Kashmir nunger ambassador ka ama inyaktsü, ta ashi. “United Nations General Assembly nung Kashmir nunger atema inyaktsü,” ta pai ashi. Tan ita tatembanglen UNGA nung pai jembitsü sentong lir.
Kashmir onük ya meimchir lendong onük ka lir; European Union aser British Parliament-ia Kashmir onük atema jembiogo, ta pai ashi.
Narendra Modi-i aniba BJP sorkar aija Imran Khan-i, India nunger sepaitemi tashi komaka amshidir amshiaka ibaji ajanga takok mangutsü, ta ashi.
Khan-i, “Kashmir nungeri India anema nokdaktsü aser yangji aliba BJP-RSS yimsüsüba anema prangpong amshitsü. Kashmir nungeri aremzükbaji Modi-i tendanger. Onoki yimjung aginer. India nunger sepaitemi tashi amshiba agi lakteter Kashmir nung arishi küm 20 tebur kati temang nung bomb alenloker Pulwama nung sepaitem amak. Pulwama amakba atema India-i asenok nem tai tonglokja Balakot amak, ajisüaka asenoki parnok meyong tayimtsü ka khazüka yok. Onoki par pilot (Wing Commander Abhinandan Varthaman) meyipa yok, kechiyong onoki rara maginer. Ato kilonser Modi-i par nüburtem dang alimai rongshiba agi Pakistan lao ta jembir saka chichiba Pakistan nungeri asütsü metsübur ta pai (Modi) memetet,” ta ashi.