Pak: Polio mozü agütsüdak pokshiba lendong atalok; 15 pokset

Pakistan kübok Quetta nung tentetba polio mozü agütsüdak kimalen pokshiba lendong ka atalokdaktsüba sülen Pakistan police aser rescue ketdangsertemi lendong atalokdak bushisüngdangba noksa nung angur. (Quetta, January 13)

Quetta, January 03 (Agencies): Pakistan southwest tsütsülen polio mozü agütsüdak kimalen pokshiba lendong tesashi ka tanü Bodbar nü atalokba osang ka police-i metetdaktsüogo.

“Quetta yimti tezülen tentetba polio centre kimalen atalokba lendong nung police ketdangser 13, mitkar 1 aser nübur 1 densema ajak agi nisung 15 poksetba osang jangjaogo ta parnoki ashi.

“Kasa lendong nung nisung 23 shi yiruba osanga tang tashi nung jangjaogo,” ta parnoki shisem.

“Peisasa pokseta asütsü mulungteter kati pa temang nung alenokba pokshitsü oset mozü ketdangsertem den yaritepa aliba police ketdangser rong nung pokdakja lendongji atalokdaktsüba osang jangjaogo,” ta provincial home minister, Sarfraz Bugti-i osang jangjashitsü.

Anogo 3 tashi agitsü ayongzükba Polio tashidak meshimeshia samatsütsü mapatong den sentaktepa mozü ketdangsertem anameta kiyongtemi yoktsü renemshidang tanü lendongji atalok ta Quetta police lenisang, Imtiaz Shah-ia metetdaktsü.

Tanü lendongji par teloki atalokdaktsü ta Jundullah ta ajaba kiralongrar telok otongdar kati tanü lendong atalokdaktsüba atema tenüng agia metetdaktsü saka tanü lendongji kechiba atalokdaktsü iba osangbo pai mememtetdaktsü.

Tarutsü mapang nunga tan amala lendong atalokja polio mozü agütsürtem amaktsü amokmerenba olen ka pai metetdaktsüogo.

“Polio mozü agütsürtem ya United States-i yokba itangitertem,” ta shia, Islamic kiralongrartemi Pakistan nung polio mozü ketdangser aser parnok anükba police ketdangsertem anema tan amala amakba lendong mapang shia atalokdaktsür.

Alima ajunga nung polio tashidak mesamatsüteti aliba linük 3 rong nung Pakistan linüka densema lir.