Pak ya kiralongrar linük ta sangdongang: Chandrashekhar

New Delhi, September 21 (Agencies): Rajya Sabha MP, Rajeev Chandrashekhar-i India sorkar nem Pakistan ya kiralongrar linük ta sangdongdaktsüner; Ato kilonser, Narendra Modi dangi züluba shidi ka nung Chandrashekhar-i, pai Parliament nung nung private members bill ka aser bangzüng ka ‘Pakistan State Sponsor of Terror’ ta ser agütsüogo, aser ibaji asükwa mongpu Parliament nung agizüktsü imlar, ta metetdaktsü.
US Congress nung America nunger tatar anati, Pakistan ya kiralongrartem senotsü agi yariba linük ta sangdongtsü atema ozüng ka benokba ajanga Pakistan Ato kilonser, Nawaz Sharif-i UN General Assembly nung jembitsü lia linük maksütsüogo.
HR 6069 mesüra Pakistan State Sponsor of Terrorism Designation Act ta ajaba bill ajanga US ketdangsertem dang ita pezü tsüngda ibaji agizüktsü atema ayonger.
Osangbenertem den jembidang Chandrasekhar-i, “Pakistan-i kiyonger tajung ka ama alitsüsa aser Pakistan den tesentaktep melenshitsüsa osang sangoktsütsü asoshi asalendong aser sepai tashi amshiba dak alia India-i rongsenkettsüng aser shishilembaba tashi-a amshitsüla,” ta ashi.
Joko mera tesadang magitsüla ta shia pai, “Parliament bangzüng aser bill ji ajanga asenoki linük telung nung aser tema nung latetba temaitsü sayutsü aser Pakistan indang mejangjai alibaji jangjatsütsü. Pakistan indang MFN (most favoured nation) maongka agienba ama rongsenkettsüng mera agiba ajanga-a Pakistan pusemer tesem (South Asia) nung aliba linüktem danga osang sangoktsütsü,” ta ashi.
Ato kilonser dangi züluba shidi nung pai Pakistan anema US bill-a tetshiogo. US Congress nung Texas nungi Ted Poe (House Subcommittee on Terrorism mendenbuba) aser California nungi Dana Rohrabacher nati iba bill benokogo.