Pak: Yipru aser tzünglu tesashi agi nisung 30 asü

Islamabad, June 02 (Agencies) : Pakistan nung yipru aser tzüngla kanga sashia aruba ajanga tetsür aser tanur kar densema, tajemba agi nisung 30 taküm samaba den nisung aika yirur lir, ta Brehostibarnü osang ajanga metetdaktsü.

Tzünglu tesashi aruba ajanga Islamabad nung nisung 11 asü aser 69 yiru. Tekümzükertemi ashiba agi, Rawalpindi yimti nunga nisung 19 asü aser 122 shi yiru.

Iba yipru aser tzünglu aruba sülen tesem aika nung electric tashia mongui lir.

Tzünglu aser yipru manenba agi International Ecological Safety Collaborative Organization (IESCO)-i mapa sanga oa meinyakteti lir ta IESCO otongdaria shisem.

Benazir International Airport nungi tayimtsü meyoki sota lir, ta tayimtsü nung inyakertemia sangdong ka ajanga metetdaktsüogo.

Mopung tesashi ona metro station tem nung kijiba indang aina aika jaksatsüba sülen Metro bus jajaba dena anendaktsüogo.

“Iba yiru lendong ajuruba tensa ka nung onok police-temia kanga mita atadar,” ta Islamabad Police nung Inspector General-i ashi.

Tzünglu onsara sashia aruba agi Federal sorkar kübok aliba Tribal tesemtem aser Khyber-Pakhtunkhwa province nung takoksa aika ajuruogo.

Tekümzükertemisa ashiba agi, Nowshehra aser Jamrud tesemtem nung tetsür 2 densema nisung 4 süogo.

Iba den külemi, Charsadda tesem nunga tanur ka asüba osang angazükogo.