Pakistan air force nung JF-17 jet tesen 16 züngoksemogo

Islamabad, February 16 (Agencies) : Tanü Brihostibarnü Pakistan air force nung JF-17 Thunder jet tasen 16 züngoksemogo. Item jet tem ya China aser Pakistan na lokteper linük arrtsülen kümzüka ayutsü mechi yanglu, ta Defence Minister-i metetdaktsü.
JF-17 Thunder jet tem ya Pakistan Air Force (PAF) nem Punjab province kübok Attock tesem nung aliba Pakistan Aeronautical Complex, Kamra nung agütsü aser iba sentong nung Defence Minister Khawaja Asif tongti tesemdanger liasü.
China aser Pakistan na lokteper yangluba item Jet tasentem ya Pakistan Air Force 14-Squadron rongnung züngoksemogo.
JF-17 Thunder ya PAF asoshi kanga tongtibang lir.
Asif-i, tarutsü mapangtem nunga sorkari PAF atema JF-17 sentongtem maneni inyaktsü terenemba lir, ta sentong nung jembidang ashi.
Defence Minister-i, Pakistan ya yimjung meimba linük ka lir aser onoki international lokti den kidanger linüktem ajak den yimjung nung liner, ta ashi.
Aji oda süaka pai, linük arrtsülen lendong aruba mesüra linük dangi lendong arutsü alibatem sorkari nokdangtsü terenemba lir, ta ashi.
Pai linük nung PAF-i kiralongrartem anema Zarb-e-Azb operation ajanga mapa tulu inyaktetba asoshi parnok tenüng sanga ashi.
Iba inyakyim ajanga yimjung bener aruba tang masü saka linük nung tesünep dena bener aruogo, ajisüaka ano rongsenkettsüng tsütsübo tera timtem alur, ta pai ashi.
China-i JF-17 Thunder jet tem yangluba nung Pakistan den yaritepba asoshi kanga pelar, ta Asif-i ashi.
Chief of Air Staff Air Chief Marshal Sohail Aman-i, JF-17 fighter jet tem dak alima nung aliba ‘fourth generation’ tayimtsütem dak keta aliba tashi keta lir, ta ashi.