Pakistan airspace March 11 nü tashi shibangtsü

Islamabad, Metsüremi/March 9 (Agencies): Pakistan Civil Aviation Authority (CAA)-i Honibarnü transit flights ajaka atema linük indang airspace March 11 nü tashi shibangtsü sangdongogo.
CAA sangdong ajanga ashiba agi, Pakistan indang airspace lapoktsüba March 11 nü (Hombar) 3:00 ako tashi atsülangogo. Hokolbarnü aviation authority-i transit flights tem Honibarnü 3:00 ako nungibo senzükdaktsütsü ta sangdonga liasü, ta Geo TV sangdong ka ajanga metetdaktsü.
Ajisüaka Honibarnü sangdong nung anüdoklen nungi anüolen aser anüolen nungi anüdoklen senzüba tayimtsü ajak atema airspace March 11 nü tashi shibanga atatsü ta metetdktsüogo. Kasa mapang nung north aser south tsüngda senzüba transit flights kar lenmang kar nungbo senzüdaktsütsü.
Sialkot, Rahim Yar Khan aser Sukkur airports koba Honibarnü lapoktsü liasü iba airport anayaa maneni shibanga atatsü.
Pakistan-i ili adokli ta asütsü asoshi airspace kar dang amshitettsü, ta kasa sangdong nung shia lir.
Pakistan kübok airport kong iba hopta tetenzüklen tayimtsü senzü tenzükogo, item airport tem nung maneni March 15 nü tashi tamalen latetja aliba ama inyaksangshitsü.
Karachi, Multan, Chitral, Lahore, Islamabad, Peshawar, Quetta aser Faisalabad airport tem nung tayimtsütem latetja aliba ama senzüsenpongtsü.
India aser Pakistan na tsüngda mangatettep adokba sülen Pakistan airspace ya February 27 nü shibanga liasü.