Pakistan Army tekolakbai LoC semdang

Islamabad, October 9 (Agencies) : Deobarnü Pakistan Army nung tekolakba, General Raheel Sharif-i Line of Control (LoC) nung aliba sepaitem semdang aser iba mapang pai sepaitem renema aliba ngua parnok nem tenüngsang agütsü.
General Sharif-i, Pakistan kübok aliba Kashmir nung Haji Pir sector semdang, ta News International osang ajanga metetdaktsü.
Kasa osang ajanga, yangji aliba commander-i India aser Pakistan na lemdangba Jammu & Kashmir LoC indang osang tejangja Sharif nem metetdaktsü, ta ashi.
General Sharif-i, LoC nung aliba sepaitemi tensa ajak atema renema aser mita aliba inyakyim ngua kanga pelaba metetdaktsü,” ta kasa osangkaket ajanga metetdaktsü.
Osang ajangasa ashiba agi, pai Loc semdangba ya kanga nüngdaka aliba mapang ka nung lir, kechiba süra tang India aser Pakistan na tsüngda tebilemtsü agi sünga aliba tensa ka lir.
General Sharif-i temalena LoC atema bendanga lemzüktsüba telok, 10 Corps Headquarters semdangogo, ta osang ajanga ashi.