Pakistan aser India na cricket asayatsüba indajibo PM ana dang asüngdangang: Ganguly

Kolkata, Mongputeni/October 17 (Agencies): BCCI tir Sourav Ganguly-i, Pakistan aser India na tsüngda cricket tanaben asayatsüba indang onükjibo India Prime Minister Narendra Modi aser Pakistan PM Imran Khan nati telemtetba agitsü, ta ashi.
India aser Pakistan na tsüngda bilateral ties indang asüngdangba mapang Ganguly-i ashiba agi, “iba tasüngdangba ya Modi aser Pakistan Prime Minister dangang asüngdangang,” ta Ganguly-i ashi.
“Telemaba agitsü nüngdaker kechiyong international tour ajak sorkari temelaba agütsür külenang asayar. Anungji iba tasüngdangba onoki melangzütettsü,” ta taoba India captain-i ashi.
Linük ana tsüngda tatemsa 2012 küm bilateral series ka asayaogo. Iba asayamung India nung asaya aser linük ana tsüngda T20 ana aser ODI asem asayaa liasü.
Arishi küm 47 tain Ganguly shibai October 23 nü BCCI tir mapa belenzüktsü lir pai 2004 küm Pakistan-i oa asayaba mapang India team takokdangi ani. 1999 küm Kargil rara sülen linük ana iba küm mezüngbuba asaya aser 1989 küm sülen 2004 küm mezüngbuba India team-i Pakistan semdanga liasü.
February 14 nü Kiralongrartemi Pulwama amakba sülen BCCI-i ICC dang kiralongrartem nem tejenokba agütsüba linük tem den tesendaktep mayutsü asüngdanga liasü, koba Pakistan atishia jembiba ka liasü.
Iba shiti ya Committee of Administrators (CoA)-i yoka liasü, shirnok nem election magi tashi board mapa achaayanga alitsü asoshi nongloktsü.
CoA-isa ICC dang Pakistan World Cup nung masayadaktsütsü asoshi asüngdanga liasü.