Pakistan Ato Kilonser-i Turkey semdangtsü

Islamabad, February 21 (Agencies) : Pakistan Ato Kilonser Nawaz Sharif-i February 22, 2017 nü nungi tenzüka anogo asemnü asoshi Turkey semdangtsü aser iba mapang Turkey yimtiba Ankara nung Pakistan-Turkey na tsüngda High Level Strategic Cooperation Council (HLSCC) 5buba senden amentsü.
Mongulbarnü Pakistan Foreign Ministry-i ashiba agi, iba sendenji February 23, 2017 nü amentsü aser senden nung tongtibang nisungtem adentsü. Pakistan nungi kilonsertem aser ketdangser tejentemi Sharif mena aotsü.
Sharif-i Turkey lenirtem den senden amenba mapang linük ana tsüngda tesendaktep atema kanga süoki ia jembiba den international tebilemtsütema jembitsü, ta osangbenertemi ashi.
HLSCC sendenji Turkey Ato Kilonser Binali Yildirim aser Sharif na sentepa ketdang asütsü. Senden nung linük ana yimsüsübaren, shishilembaba, energy, bank inyakyim aser rongsenkettsüng, tongtepratep, railways, kaketshisatsü, sobaliba aser tourism onüktem tongtibang sür olemteptsü.
Linük ana tsüngda HLSCC ya 2009 küm tenzük aser 4buba senden 2015 küm Islamabad nung mena liasü. Tan Turkey-i aoba mapang Sharif-i Turkey Tir, Recep Tayyip Erdogan dena ajuruteptsü sentong lir.