Pakistan Ato Kilonser Sharif-i Kashmir metoktsütsü ashi

Islamabad, August 16 (Agencies) : Mongulbarnü Pakistan Ato Kilonser Nawaz Sharif-i Jammu & Kashmir nung lisopur nüjiso atema raraba nung tapu ajak agi yaritsü ta maneni metetdaktsü.
Sharif-i iba o ya Pakistan kübok aliba Kashmir nung Tir mapa nungi anensang Sardar Yaqoob Khan tang ashi, ta Radio Pakistan osang nung ashi.
Ato Kilonser, Sharif-i, tai maketba Kashmir nüburtemi raradang amshiba oset kecha mami parnok temeten atema nokdak dang taküm aika laluba ya alimai angatettsüla, ta shisem.
India nunger nüjiso anguba anogomong amongnü India Ato Kilonser Narendra Modi-i o jembiba mapang Balochistan aser Pakistan kübok aliba Kashmir nüjiso atema jembiba sülen Sharif-i iba o ya jembi.
Narendra Modi-i Red Fort nung jembiba oji ashioktsüba mesüra temangmangtsü o lir, ta Islamabad nungi ashi.
Foreign policy chief Sartaj Aziz-i, “India Kashmir aser Azad Jammu & Kashmir tebilemtsü ya ulura,” ta ashi.
July 8, 2016 nü Sorkar anema rarar commander Burhan Wani tepsetba sülen Kashmir tenemtsüng nung hopta aika kanga animesüngzüki lir.
Mongubarnü security temi injang akahba mapang longkak aiter public parnok pongu kahset aser parnok pongu ya densem tang tashi nung tasür ajak agi parnok 65 kümogo.
Wani tepseter tananü, July 9, 2016 nü nungi tang tashi kaketrejutem, dokan, transport aser shishilembaba tapu ajak shibanga lir.