Pakistan Ato Kilonser, Sharif-i Turkmenistan linük semdanger

Ashgabat, November 25 (Agencies): Pakistan Ato Kilonser, Nawaz Sharif-i anogo 2 agia Turkmenistan semdangtsü nükjidong nung Ashgabat yimtiba tanü, Hokolbar nü tonga ogo.
Sharif-i Ashgabat tayimtsü anendak tonga aoba sülen Turkmenistan deputy Prime Minister aser Ashgabat nung tentetba Pakistan embassy ketdangsertemi pa agizüka liasü.
Turkmenistan Tir, Qurban Ali Berdi Muhammadov den tanü nikongtsütsü ajurutepa senden amendang, Sharif tenati par linük ana tsüngda tayimtsü agi sendakteptsü sabang tajungba kümtsütsü onük benoka jembiba den Trans-Afghanistan Pipeline ta ajaba Turkmenistan-Afghanistan-Pakistan-India (TAPI) Gas Pipeline mapatong den sentakba onük benokba osang jangjaogo.
Turkmenistan nungi Afghanistan ajangdang Pakistan aser India na tonga Caspian Sea nungi atsütetba natural gas bener aotsü nükjidong nung TAPI pipeline mapatong 2015 küm December ita 13 nü Turkmenistan nung tenzüka liasü.
Tarutsü mapang, 2019 küm nungi tenzüka mapa inyakdaktsütsü asoshi alizüng ayuba pipeline yanglutsü atema Asian Development Bank (ADB)-i nungdakba senotsü agüja yariba osanga bushiteta lir.
Sharif-i tan Turkmenistan semdangdang pai United Nations (UN)-i ayonger Ashgabat yimtiba nung amentsü renemba Global Conference on Sustainable Transport (GCST) senden nunga shilem agitsü renema lir.
UN Secretary General, Ban Ki-moon den yaritepa, Turkmenistan linüki ketdangsüa amentsü renemba GCST senden nung UN yimsüsürtem densema, alima linük balala nungi lenir 1,500 shi shilem agitsü renemba osang angazükogo.