Pakistan bomb lendong nung nisung 12 asü

Quetta, June 23 : 2017, June 23 nü Quetta, Pakistan nung bomb apokdang yiruba nisung ka mozüki-i anir aoba mapang tangokba noksa nung angur.

Islamabad, June 23 (Agencies): South west Pakistan nung aliba Quetta yimti nung suicide car bomb ka Provincial police tekolakba indang office anasa apok, aser iba lendong nung nisung 12 pokset aser 14 yiru, ta police temi osangbener dang ashi.
Balochistan police tekolakba indang office kima aliba checkpost nung Hokulbar anepdang iba lendong adalok, ta police ketdangser kati ashi.
Iba lendong nung asürtem rongnung police tanishir trok densema lir, ta senior police officer, Ali Mardan-ia ashi.
Gari ka iba checkpost anasai aruba mapang police temi iba gari anendaktsü aser iba mapang bomb ya apok, ta provincial sorkar indang odongtar, Anwar ul Haq Kakar-i osangbener dang ashi.
“Anepdang 8:45 (03:45 GMT) ako meta Toyota Corolla gari tejen ka police tekolakba indang office anasai aru aser iba gari ya police temi anendaktsü. Iba mapang bomb ya apok,” ta Kakar-i ashi.
Pakistan Taliban indang telok, Jamaat-ur-Ahrar ajanga iba lendong ya agütsü, ta iba telok indang odongtar, Asad Mansoor-i sangdong ka nung ashi.
“Iba lendong nung yirur alir ya kar bo temang kanga mejungi lir. Aser parnok timba police aser traffic ketdangser lir,” ta police ketdangser, Altaf Hussain-i ashi.
“Iba lendong agütsüba tesem ya ‘red zone’ lir aser iba tesem nung IG indang office aser State Bank of Pakistan lir,” ta Altaf Hussain-isa ashi.
Balochistan province indang yimtiba, Quetta nung sorkar aser mitkar indang kiojen nung tenük yoka iba ama lendong agütsür aser nüburtem dak kasa lendong agütsür.
Quetta nung aliba Saryab abu kübok February ita nung bomb ka apokba mapang bomb disposal squad ana aser civilian 11 asü.
Taoba küm August ita iba yimti nung aliba Civil Hospital nung pei sasa temang nung bomb inoker pokdaktsüba lendong nung nisung 74 asü aser ita ana sülen police academy ka amakdang nisung 60 asü.
Item lendong agütsüba ya Pakistan Taliban, ISIL aser Pakistan nungi nüchiso meshir telok, Baloch ajanga tenüng agia lir.