Pakistan: Bus tsüktepba lendong nung 27 tsükset; 60 shi yiru

Lahore, October 17 (Agencies): Pakistan kübok Punjab province nung nübur anir senzüba bus gari ana tsüktepa, lendong atalokba ajanga nisung 27 shi tsüksetba aser nisung 60 dak tema tanü, Hombar nü yiruba osang ka Pakistan rescue ketdangsertemi metetdaktsüogo.
Tan bus tsüktepba lendongji Lahore yimti nungi kilometer 600 shi pilar, Rahim Yar Khan kübok Khanpur area nung atalokba osang jangjaogo.
“Tanü lendong ajuruba bus ka Faisalabad toktsür Bahawalpur bushia aoba aser tanabuba bus-i Rahim Yar Khan toktsür Karachi yimti bushia aoba osang jangjaogo,” ta Pakistan rescue services otongdar, Deeba Shahnaz-i metetdaktsü.
Laisa ashiba agi, bus kanga kara aniba ajanga tan lendongji ajuruba osang angazükogo.
“Tan lendongji kangasa sashia atalokba ajanga bus gari shilem kar rangzüka indokba sülen ang bus telung nung alir tasümangtem agiteta liasü,” ta Rahim Yar Khan District Coordination officer, Zafar Iqbal-i osang jangjashitsü.
“Tan lendong nung yirurtem Khanpur aser Rahim Yar Khan nung tentetba mozüki tonga anir  oa idakji anepalutsü tenzüka lir,” ta shia, tan lendong nung nisung asüba osangji tang jangjaba dang nungi timba akümtsü akok ta temulung melemi bilemba olen ka paisa metetdaktsü.
Ano külen, tan lendong atalokba ajanga nisung asüba atema sasa bilemba olen ka lemsatepba den yirurtem nem  teyari tajungtiba agütsütsü tetuyuba ka Pakistan Ato Kilonser, Nawaz Sharif-ia agütsüogo.