Pakistan court-i PML-N lennir Shehbaz Sharif nem bail agütsü

Lahore, Tsüklai/Feb. 14 (Agencies): Pakistan Muslim League-Nawaz (PML-N) tekolakba aser National Assembly nung Leader of Opposition Shehbaz Sharif shiba tang tsüngden chiokdak ali, pa nem court ajanga Brehostibarnü bail melaogo.
Sen crore 1400 jenjang Ashiyana Housing aser Ramzan Sugar Mills ken o nung Sharif-i mepeshiba ama Lahore High Court nung Justice Malik Shahzad Ahmed tekolakba sür züngsem anati akümba bench ajanga pa nem bail agütsü.
National Accountability Bureau (NAB) ajanga tepuokdak alisang taoba ato kilonser Nawaz Sharif tenu arishi küm 67 tain Shehbaz Sharif ya October 5 nü tepuokdaki yoka liasü. Scheme ka inyaktsü asoshi takok ngua bid süteter ka pai thija kasa mapaji pai sapuba firm ka nem agütsü, ta tai tonglokja lir.
Sharif shiba Kot Lakhpat jail Lahore nung liasü, pai iba obendang ya ochi agi akokba ta sangdong. Yimten yimsüsüba nung ajemdaker pa anema tiazü ken o benoker, ta pai ashi. Pai senbak ka danga meshidaki amshiba kuli sayutetra pai yimten yimsüsüba toktsütsü, ta shia lir. Ken o anaprong nung NAB prosecutor temi tai tonglokja aliba ama Sharif anema kuli bener marutet.
Sharif ya kangkadang tongtibang Punjab province nung chief minister ka ama 2013 nungi 2018 tashi inyaka liasü. Pa teti tambusang ya party lennir inyaktsü nokdangba sülen pa PML-N tir aküm. Nawaz ya Al-Azizia Mills ochimashi ken o nung aija Kot Lakhpat jail nung küm tenet alitsü obendanga agüja yangji lidagi.
Pai Islamabad high court nung temang manemba mechi bail nung chioktsü application agüja lir. Nawaz ya temulungjang agi mapa junga meinyakba timtem ka lir aser sorkari tentettsüba multi-disciplinary medical board ajanga pa cardiac facility nung anogoshia ghonda 24 anepaludaktsütsü shia lir.