Pakistan cricket asayartem India nung temeim tuluba angur:Afridi

Kolkata, March 13 (Agencies) : Kolkata nung par telok kanga junga agizükba sülen, Pakistan captain Shahid Afridi-i, Pakistan cricket asayartem ozü linük dang nungibo India nung temeim tuluba angur, ta ashi.
“Yangi onok sapurtem nungi temeim onsara angur aser ibaji Pakistan nung onok sapurtemi meimba dang nungi tuluba,” ta World Twenty20 nung shilem agitsü asoshi tonga aruba sülen Afridi-i Eden Gardens nung osangbenertem dang ashi.
Arishi küm 36 tain, all-rounder, Afridi-i, ni joko küm 20 shi India-i cricket asayai arur aser iba asaya ajanga India o Pakistan na lungjema kümdaktsür, ta ashi.
Osangbener ka dang Afridi-i ashiba agi, India-i cricket asayai aotsü maotsüji nenok mulung ta ozü sorkari ashi ajisüaka shingaia arendaka melii aruba ajanga ozü sorkari India nung security atema tsübua bilembaji tai ta sayur.
“Parnoki ashibaji mangar ta masü kechiba süra sorkar telemtetbaji onokia nungiter. Onok ya yimsüsür masü,” ta pai ashi.
Pakistan sorkari India security inyakyim agi temulung masüba ajanga cricket asayartem Mongulbarnü India atongtsü aliba thinen. Home Minister Rajnath Singh-i security ajungtsü ta metetdaktsüba sülen ang parnok Honibarnü India atong.
Eden Gardens nung nisung 65,000 sentepa yur ola tulu angashia asayadang temulung ajema akümtsü makümtsü ta asüngdangdang pai, “International cricket nung teti pressure lir. Shirnoki ibaji azüokteter parnoki takok angur,” ta langzü.
“Ni joko asaya nungi anisüngzüktsü mapang tonga arur, ajisüaka ni India nung temeim anguba kü taküm piyong mamatsü. India nung aliba nüburtemi cricket aser iba asaya asayartem kanga meimer. Parnoki junga asayartem meimer,” ta Afridi-i ashi.
Afridi-i tang tashi nung One-Day Internationals (ODI) 398, T20 94 aser Test 27 asayaogo.