Pakistan cricketer, Malik-i test asaya toktsür

Islamabad, November 03 (Agencies): Pakistan nunger batsman, Shoib Malik-i tang England den tasayadak test asaya tembangba sülen joko test cricket asayabaren toktsütsü lemtetba osang ka tanü Mongolbar nü metetdaktsüogo.
Arishi küm 33 tain Malik-i United Arab Emirates kübok Abu Dhabi nung asayaba asaya 3 densemba test series nung runs 245 tashi yanglua tanaben test asaya nung shilem agitsü tenzük.
Iba mapang nungi tenzüka Malik-i tanü tashi nung shilem agiba test inning 5 nung ajak agi runs 47 tashi yanglua lir.
Ano, tanü test asayatsüren toktsütsü osang sangoktsüba jakdang Malik-i tanü asaya nung runs 33 agüja wicket 4 tashi agiba osang jangjaogo.
“Lanur asayartem nem maongka agütsütsü tangatetba nung ni test cricket asayatsüren toktsütsü lemtetogo,” ta 2001 küm mezüngsüa test asaya nung shilem agisang, Malik-i metetdaktsü.
Malik-i test asaya nung shilem agitsü tenzüker tanü tashi nung test asaya 35 nung shilem agia ajak agi runs 1,800 yangluba osang bushiteta lir.