Pakistan den India teti kümküma alitsüla: PM Modi

New Delhi, June 28 (Agencies): Hombarnü Ato kilonser, Narendra Modi-i, Pakistan linük den India mapang ajak nung kanga kümdanga aser kümküma alitsüla, ta ashiba den külemi Pakistan den arrtsü ken oji shirnok den jembitsüla- sorkar asü tangartem den jembitsü’ar ratar, ta ashi.
Ato kilonserisa, arrtsülen nungi kiralongraba atema maneni jembiba ajanga tangbo alimai India-i benokba onük amangogo, ta ashi.
“Mezüngbubaji, Pakistan den arrtsü ken o jembitsü ji shirnok den jembitsüla’ar ibaji lemtettsüla- sorkar asü tangar den jembitsüla. Anungji mapang ajak nung India kümküma alitsüla aser kümdanga alitsüla. Mapa nung tapok madokdaktsütsüla,” ta pai Times Now channel den jembidang ashi.
Pakistan den arrtsü ken oji shirnok den jembitsüla ta Modi dang asüngdanga liasü, kechiyong 2014 küm, iba ken o ya Hurriyat den masü saka linük ana tsüngda dang jembitsüla ta ashi, saka iba sülen Mumbai 26/11 atalok aser tang Pathankot tatalokba liasü.
Modi-i, pai Lahore semdangba mesüra Pakistan Ato kilonser linüki arutsü jaokba ama pai meranga inyakba ajanga tangbo pai alima dang kiralongraba nung India’er tangatetba ashitsü menüngdak, ta ashi.
“Alimai ola ka ser India agiba shilem tenüng asanger. Pakistan-i telangzüba agütsütsü tasak akümer. Alimai reprangdar. Asenokiji tetsükdaktsü ka süra alima dang asenok yamai masü ta sayutsüla,” ta Modi-i ashi.
“Tamalenbo kiralongraba nung India’er tangatetba alimai mamangi liasü, aser khenkhenbo ibaji tzüzüng-ozüng timtem dang lir ta züngshi. Tangbo India-i kiralongraba onük benokbaji alimai amanger. Kiralongraba ajanga India takoksa angubaji alimai amanger. India-i maneni kasa onük benoktsüla ta ni bilemer,” ta paisa shisem.