Pakistan den International arrtsü km 2,300 shibangtsü

New Delhi, October 06 (Agencies): Centre sorkari Pakistan den International arrtsü kilometer 2,300 shibangtsü sentong lir aser iba atemaji tanü Union Home minister, Rajnath Singh-i Jaisalmer nung Jammu and Kashmir, Punjab, Rajasthan aser Gujarat state tem nungi Home Minister tem den senden menogo.
Arrtsü shibangba sülenbo checkpoint ka mesüra ana nungi dang khu/osettsüset aser nisung ajanga senzütsü akoktsü.
Entry-exit point tongtiji  Wagah-Attari integrated check post asütsü. Tang benokba  mapatong ajanga Army-i anükba Line of Control (LoC) masü saka Border Security Force (BSF) sepaitemi anükba Inetrnational arrtsü ayimjemtsü. Tang LoC nung shishilembaba lenmang point ana- Uri-Salambad aser Poonch-Rawalkote nung lir.
“Iba nükjidong ya osettsüset belenba mesüra nisung senzüba tesem ka mesüra ana dang asütsü atema lir, aser tanüngba point tem bo shibangtsü. Iba ya ajanga ozüng alema shibelenertem, temzüng alema linük telungi aitertem aser telungpurtem nokdangtsü,” ta Home ministry nung tongti ketdangser kati ashi.
Item checkpoints nung security jenjang tajungba akumtsü. Kulikatet tejangja makartem telungi aittsü memelatsü,” ta ketdangserisa ashi.
Centre-isa International arrtsü nung radars, CCTV camera, laser fence aser  motion sensors inoktsü.
“Iba nükjidong ya, mapang ajak nung technology tajung amshia mittsü aser tarutsü nung Pathankot tatalokba ama nokdangtsü atema India’er anüdoklen arrtsü shibangtsü asoshi lir,” ta paisa shisem.
Tanü iba senden nung Ministry of Home Affairs border management division aser BSF tongti ketdangsertema denogo, ta osang angazüker.