Pakistan-i gadu belen tenzüktsü

Islamabad, Tsükali/February 2 (Agencies): Tenangzüktepba khenyongi balaka yangluba nung China-i Pakistan nung gadu (Donkey) metsüba tsütsü sen indoktsü aser mapang tatsüka lir kidanger linüki gadu tem ya belentsü.
Khyber Pakhtunkhwa livestock department-i donkey export plan nung shilem ka ama foreign partnership den külemi gadu metsüdak lapoktsü telemtetba agiogo.
“Tenangzüktepba ya China sorkar aser company tem den sign süteptsü,” ta provincial department nung ketdangsertemi ashi.
Gadu ya shilem balala lemsar mapang balala nung belentsü aser tashi mait aser shiranga aliba gadu tem tamasa belentsü.
Mezüngbuba küm asem tsüngda gadu 80,000 shi belentsü.
Gadu metsüba nung China nunger company temi USD billion 3 indoktsü mulunga aliba metetdaktsüogo.
Khyber Pakhtunwala province nung gadu ya sen aaba tsütsü kanga tongtibang lir, kong kibong 70,000 shi iba shiruru dak metaloker alir.
Ketdangsertemi iba ya temulungdang yur iba province yagi gadu peria belener aotsü inyaktepdar.
Ketdangsertemi ashiba agi, gadu ya China nung kanga bushiteper kechiyong iba ya mozü aser furniture yangluba nung amshir.