Pakistan-i Haifz Saeed’er JuD aser FIF rongsen sota ayur

Islamabad, Metsüremi/March 06 (Agencies): Pakistan-i nokdanga aliba lokti tentettem anema mapa inyakba tali tesashiba kümshia Mumbai nung kiralongra mapa inyakba sentong yanglur Hafiz Saeed-i aniba Jamaat-ud-Dawa aser par kongsang Falah-e-Insaniat Foundation meyong kaket reju aser rongsen Bodhbarnü sota yuogo.
Jamaat-ud-Dawa (JuD) aser Falah-e-Insaniat Foundation (FIF) indang rongsen meshizüka ayuba ya Pakistan-i taoba Mongulbarnü iba lokti tentet ya nokdanga aliba teloktem den züngoksemba sülen ataloker.
Pakistan indang National Counter Terrorism Authority (NACTA) koba Mongulbarnü update asü, yangji Anti-Terrorism Act, 1997 kübok Ministry of Interior ajanga lokti tentet 70 züngoka lir aser item rongnung JuD aser FIF ya densema lir.
Ozüng amshirtemi Mongulbarnü National Action Plan (NAP) kübok mapa tamajung inyaker anema sentong tasen tenzükba mapang sorkari JuD aser FIF meyong kaket reju ana aser kiojen tem agiogo, ta Dawn osangkaket ajanga ashi.
Punjab province indang additional chief secretary-i commissioner aser divisional police tekulakpur den video link ajanga senden mena item kiojen agitsü totuyuba agütsüba sülen Chakwal aser Attock district tem nung maparen tulu inyakogo, ta iba osangkaket ajanga ashi.
Talagang area nung aliba Chakwal Madrassa Khalid Bin Waleed aser Chakwal’s Railway Road nung aliba Madrassa Darus Salam kaket rejutem aser yangji inyaker Auqaf Department ya sepaitem ket nung lir.
Punjab sorkari totuyuba agütsüba sülen kaket reju agitsü asoshi ketdangsertem shimtet. Divisional intelligence committee ajanga February 27 nü survey tasen agiba mapang Attock nung JuD aser FIF indang kiojen asem nguteta liasü, ta osang ajanga ashi.