Pakistan-i IAF pilot Abhinandan Varthaman chiokogo

Hokolbar aonung Wagah-Attari border nung IAF Wing Commander Abhinandan Varthaman Pakistan litsü tsütsü nung alidang agiba noksa ka angur. 

Attari-Wagah Border, March 1 (Agencies): Pakistan-i apuba Indian Air Force (IAF) pilot Abhinandan Varthaman taonung 9:20 ako meta India-i meyipa aruogo.
Pakistan-i pa chioktsü mapang anaben tashi melenshi aser ghonda pezü shi menur ang pa chiok ta osang ka ajanga ashi.
Anogo ana tashi Pakistan ket nung ayuba sülen sepaitem aser media temi Wing Commander Abhinandan Varthaman India-i meyipa arutsü atema tanü nungi yongya atatep, saka inyakyim kar menuba den kulikaket timtem kar ajanga pa mapang shitak nung mechiok.
Wagah crossing nung Indian aser Pakistani sepaitemi flag atsüzükba sentong agidang nisung aika adenshia repranger saka tanü nisung aika madenshidaktsütsü atema iba sentong athi.
Hokolbar aonung 9:15 ako meta Wing Commander Abhinandan ya Attari-Wagah crossing nung Pakistan litsü nung liasü aser 9:20 meta ang pa India lushi nung tetsüng ajemok.
Abhinandan-i Pakistani F-16 tayimtsü ka khazüka yokba sülen Pakistan sepaitemi pa aniba Mig-21 Bison tayimtsü khazüka yok. Idangji pai tayimtsü nungi parachute bener jokteta tugu saka Line of Control adener Pakistan lushi nung anen. Idangji pa Pakistan sepaitemi apuba sülen anogo asem shi ka parnok ket nung liasü.
Pa apuba indang video ka Pakistani accounts nungi prokshi aser iba ajanga India nunger aika shisabulu aser temulung shirangtep. Arishi küm 38 tain Abhinandan tenük nembangtsür, teni nungi azü yima aser pa teka tesülen nungi alener aliba video ka sayu. Ano tanga video ka nung pa ayong ka nungi nisungtemi longpanger merenshiba sayu.
Ajisüaka, Pakistan-i Geneva Convention alema mapa inyaker ta nisungtemi aitsüba sülen Pakistan-i video temji agien.
Iba sülen tanga video ka nung Abhinandan Varthaman-i süngo ajemba aser Pakistan Army-i pa anepaluba indang jembiba ka sayu.
Yashi Pakistani Prime Minister Imran Khan-i yimjung tangatetba nung Abhinandan chioktsü ta sangoktsüba ajanga tensa tajungba aküm.
India sorkari Pakistan dang Islamabad nungi IAF pilot meyipa anir arutsü tema IAF tayimtsü balaka yoktsü asüngdang saka ibaji magizük.
India-i pa indangindanga Delhi-i anir arutsü aser asüngdangyaba sülen medical check-up asütsü bilema liasü, ta osang ka ajanga ashi.
“Pa meyipa aruba atema onok kanga pelar” ta taonung Assistant chief of air staff, Air Vice Marshal R.G.K. Kapoor-i osangbener dang ashi.