Pakistan-i IB nung ceasefire alema inyak

Jammu, October 21 (Agencies): Tanü agi anogo pezünübuba Pakistan sepaitemi Jammu & Kashmir, Kathua district nung aliba International arrtsü nung cease fire alema injang yokdang BSF sepai ka yiruogo.
Brihostibarnüa kasa tesem nung BSF sepaitemi telungpur trok arrtsü adena aittsü merangba nokdangteta liasü.
“Tanep 9:45 ako meta Pakistan nunger sepaitemi iba district kübok Hiranagar sector, Bobiya tesem nung aliba forward border out post (BoP) nung injang yok,” ta BSF ketdangser kati ashi.
Pakistan sepaitemi India nunger posts nung prangpong tila, automatic prangpong injang den 82 mm mortars bombs amshi, ta paisa ashi.
Iba sector nung tanü agi anogo pezünübuba India aser Pakistan sepaitem tsüngda injang yoktepdar.
“Arrtsü anüker BSF sepaitemia injang yoka minute 15 dak tema injang maneni aka. Iba mapang nung BSF sepai ka yiru,” ta paisa ashi.
Osang ajanga angazükba agi, iba mapang nungsa Pakistan nungner sepai kata süogo.
Tawa Indian army temi PoK nung kiralongrar teseptem amakba sülen J&K state nung aliba International arrtsü aser LoC nung Pakistan-i ceasefire ozüng alema 31 ben tashi inyakogo.