Pakistan-i India sepia Chandu Babulal Chavan chiokogo

Islamabad, January 21 (Agencies) : Pakistan-i yimjung tesandaktep tashi itshitsü mechi nung India nunger sepai Chandu Babulal Chavan pua aliba chiokogo.
India nunger sepia, Chandu-i September 29, 2016 nü memeteti Line of Control (LoC) atena aiba ajanga pua ayu.
Aji oda süaka, Pakistan Army-ibo paji par lenirtemi mezüngmeshia amshiba ajanga pa lemzükba duty toktsü ta ashir. Chandu ya India-i Pakistan nung surgical strikes asüba anogo nung apu ta Pakistan-isa ashi. Pakistan-i Chandu ya Wagah border checkpost nung India nunger nem meyipa agütsü.
“Par linertemi mezüngmeshia amshiba ajanga India nunger sepia, Chandu Babulal Chavan-i LoC nung pa tata duty toktsü. September 26, 2016 nü pai metetsümonga LoC atena aiter Pakistan Army nem pudaktsü,” ta Pakistan Inter-Services Public Relations sangdong ka ajanga metetdaktsü.
Pakistan foreign ministry sangdong nung, “Pakistan-i LoC nung yimjung aser tesünep tali tashi ita akümtsü nükjidong den meimchir ka temeden nem akümtsübu agütsüba temaitsü Chandu chioktsü lemtet. India-i raratsü atema bilemaka Pakistan-ibo kidanger den yimjung nung liner aser yimjung o security raksartem onoki maginer,” ta shia lir.
Brihostibarnü India MoS Defence, Subhash Bhamre-i, Chandu Chavan ki kanga junga atongtsü imlar, ta ashi.
“India-i surgical strikes sür anogo tanabuba nung Chandu-i memeteti LoC atena Pakistan leni ai. Iba sülen nungi DGMO aser MEA naprongi Pakistan den maneni tongtepratepa liasü. Mezüngbo Pakistan nungi telangzüba kecha mangu saka tangbo telangzüba tajung nguogo,” ta Bhamre ashi.
37 Rashtriya Rifles nung sepia, Chandu ya Dhule, Maharashtra nungi lir aser iba tesem ya Bhamre toktepba Lok Sabha constituency lir.