Pakistan-i Indian High Commissioner meindoker

Islamabad, Luroi/August 07 (Agencies): New Delhi-i Jammu and Kashmir nungi special status agienja iba state Union Territory ana küma sadangtsür anogo ka lir Pakistan-i Bodhbarnü Indian High Commissioner atsüngdoker aser linük ana tsüngda shishilemba anena atar ta sangdongogo.
“Onoki Delhi nungi ozü ambassador ajatsü aser par envoy yoktsü,” ta Pakistan foreign minister Shah Mehmood Qureshi-i television ajanga sangdong, aser sorkar sangdong ka nung Pakistan-i nuclear nok-o-nü bena aliba kidanger linük ana tsüngta tesendaktep tamajungba akümba ajanga shishilembaba anena atatsü ta ashi.
Pakistan Ato Kilonser Imran Khan-i National Security Committee (NSC) indang tongtibang senden ka ayongzüka amenba sülen iba osang ya sangdong, kong civilian aser mitkar lenirtem dena liasü.
Jammu and Kashmir nem agüja aliba special status agientsü mechi India-i Hombarnü Constitution indang Article 370 agientsü aser iba state ya Union Territory ana kümtsü – Jammu and Kashmir aser Ladakh.
India High Commissioner Bisaria ya Islamabad nung lir aser Pakistan High Commissioner Moin-ul-Haq-i New Delhi nung anu mapa magizüki lir.
NSC senden amenba sülen osang ka sangdongba nung, India sorkari lemtetba aser ozüng alema mapa inyakba ajanga tensa adokdaktsüba indang Committee-i jembiogo, ta shia lir.
Committee ajanga India den tesendaktep tajemba kümdaktsütsü aser India den shishilembaba anena atatsü lemtet, ta sangdong nungsa ashi.
Iba ken o (India-i Article 370 indokba) ya United Nations aser Security Council dangi abentsü lemtet aser linüki taküm Independence Day ya Kashmir nung aliba nüburtem den tejashi lemsatepa August 14 nü amungtsü, ta Pakistan-i sangdongba nung shia lir.
Iba Valley nung nisung meimchir temeden alema inyakba temai adokdaktsütsü asoshi Ato Kilonser Khan-i diplomatic channel ajunga kümkümshia alitsü totuyuba agütsü. Aser pai mitkartem dang maneni kümdanga alitsü totuyuba agütsü, ta sangdong nung shia lir.
Iba senden nung Foreign Minister, Defense Minister, Interior Minister, Advisor on finance, Kashmir Affairs Minister, Joint Chiefs of Staff Committee Chairman, services asem tekolakba, ISI tekolakba aser tanga ketdangsertem aden.