Pakistan-i J&K-i kiralongrar yokba anentsüla: Army tongti Rawat

Pahalgam (J&K), Monupii/May 25 (Agencies): Jammu & Kashmir nung yimjung maneni lira telungpurtem anema operation aoba anentsü, ajisüaka kiralongrartemi meshidaki inyakra idangyongjisa tanaben shisadanga inyaktsü, ta tanü Army Chief General, Bipin Rawat-i metetdaktsü.
Rawat-isa, Pakistan linüki atangji yimjung aginüra parnoki state telungi kiralongrartem yokba anentsüla, ta ashi.
Tanü Srinagar nungi kilometer 95 shi pilar aliba Pahalgam nung osangbenertem den jembidang Rawat-i, “Pakistan-i atangji yimjung aginüra, parnoki mezüngbuba mera agia parnoki asen tsütsüleni kiralongrartem yokba anentsüla. Arrtsü adena aitba ajanga ceasefire ozüng alema timba inyakteper,” ta ashi.
Army tongtiisa, India-i arrtsülen yimjung aginer, ajisüaka Pakistan-i tanen makai ceasefire ozüng alema inyaker, ibayongji nisung asüba den kiojen jenti raksatsür, ta ashi.
“Item amaji kodang atalokdir onokia telangzüba agutsütsüsa akumer. Ceasefire ozüng alema inyakra onokia meyiptsütsü,” ta pai ashi.
Arrtsülen kiralongra anentsü atema yimjung nüngdaker, ta pai ashi.
Pai ashiba agi, Jammu & Kashmir nung kiralongra anema inyakba anena atabaji nüburtem nem yimjung tajangzük metetdaktsütsü asoshi lir.
Monupii/May 16, 2018 nü Union home ministry-i sangdong ka ajanga, temeshi ita Ramzan mapang nung yimjung alitsü atema security sepaitemi Jammu & Kashmir nung telungpur anema operation aoba anena atatsü, ta sangdonga liasü.
Ajisüaka nisung asütsüsa mesüra kiojen raksatsüsa tensa ajurua sepaitemi marendaki meyiptsütsü, ta ministry-isa metetdaktsü.
Gen Rawat-i, yimjung tensa maneni lira J&K nung ceasefire maneni alitsü, ta shisem.