Pakistan-i J&K nung timtem agütsür: Rahul

New Delhi, August 28 (Agencies): Bodhbarnü Congress Party lenir, Rahul Gandhi-i, Kashmir ya India telung onük ka lir, anungji Pakistan mesüra tanga linük kechaia tiyongtsüi maittsüla, ta ashi.
“Onük aika nung ni sorkar den ai-aura makar. Ajisüaka ni iba yabo züngbong ashir: Kashmir ya India telung onük ka lir, anungji Pakistan mesüra tanga linük kechaia tiyongtsüi maittsüla,” ta pai ashi.
Rahul Gandhi-isa, Kashmir nung rara ya Pakistan-i ajungshiba ajanga lir, ta tai tongloktsü.
“Jammu & Kashmir nung mepetmesü lir. Iba ya Pakistan-i ajungshiba aser pusemba ajanga lir. Alima nung kiralongra pusemba tongti linükji Pakistan ta ajaki meteta lir,” ta Congress lenirisa ashi.
Pakistan Minister for human rights, Shireen Mazari-i, Kashmir onük nung lai United Nations Special Procedures mandate-holders 18 dangi shidi ka züluogo aser shidi nungji Rahul Gandhi-ia Jammu & Kashmir nung nisungtem südar, ta jembiba indanga shia lir, ta metetdaktsüba sülen Rahul-i Pakistan aija jembir.
Ano külen Congress Party-ia Pakistan-i UN dangi züluba temepishiba shidi nung party lenir, Rahul Gandhi tenüng tetshiba atema Pakistan sorkar aitsüogo.
Congress-i sangdong ka ajanga, Jammu, Kashmir aser Ladakh ya India shilem ka liasü aser India shilemsa asütsü, ta metetdaktsü.