Pakistan-i Kashmir ken o bentettsü ajungshir: Johnson

Islamabad, November 24 (Agencies): Pakistan linüki India den tebenshidak Kashmir mangatettep ken o benteta yimjung lidaktsütsü tajungshiba olen ka Britain Foreign Secretary, Boris Johnson-i tanü, Brehostibar nü metetdaktsüogo.
“India aser Pakistan na tsüngda mangatettep adoka, tongpang raraba ajanga nür linük ana densemba region shishilembadak tongti mekümtsüteti lir,” ta shia, par linük ana tsüngda adokba mangatettep ken o angatettepa bentettsü atema Johnson-i ajungshia ashi.
Arrtsü adena injang bomb kalokja, Pakistan kübok Azad Jammu & Kashmir nung ishiba agi nisung 9 shi pokseta lendong ataloker anogo tanabuba nung tan mezüngsüa Pakistan semdangsang, Johnson-i tanü iba olenji sangoktsü.
“India aser Pakistan na tsüngda adokba ken o nung ozü Britain linüki yimjung atema jembitsür linük ka ama shilem magitettsü. Anungji, Kashmir nung alir nüburtem taginüba angateta, India aser Pakistan nati Kashmir den sentakba mangatettep ken o bentettsü ajungshir,” ta pai nenshia ashi.
“Yimjung mapatong tenzükba jakdang, linük anaprongla nungi mitkartemi Line of Control (LoC) nung tongpang rarabaren anentsü nungdaker. Kidangsüa alir India aser Pakistan na tsüngda yimji yimjung lia, tesendaktep junga lira, linük anaprongla den alima nem tajangzük tulu agütsütsü,” ta Johnson-i shisem.
Anogo 2 agia Pakistan semdangtsü tenzüksang, Johnson-i Pakistan lenirtem den US Tir tasenba akümtsü temeten ngua alisang, Donald Trump den sentakba onüktema benoka jembiba osang angazükogo.
Ano külen, Pakistan Ato Kilonser, Nawaz Sharif-i asüng, Hokolbar nü nungi tenzüka, anogo 2 agia Turkmenistan linük semdanga, Ashgabat yimtiba nung amentsü ayongba Global Conference on Sustainable Transport senden nung shilem agitsü renemba osang ka Pakistan ketdangsertemi metetedaktsüogo.