Pakistan-i kiralongrar network ajak raksatsütsüla: Obama

Washington, January 24 (Agencies): Pakistan nung amenoka aliba kiralongrartemi Pathankot amakba ya India-i mapang talangka nungi aremzüka aruba tatishitsü tajung ka ta shia tanü US Tir, Barack Obama-i, Pakistan-i par linük nungi inyakba kiralongrar network ajak raksatsütsüla, ta shigoo.
Obama-i, Pakistan-i par linük nung aliba kiralongrar telok ajunga anema mera takang agia apusotettsü aser apusotsüla, ta ashi.
Piasa, kiralongrartem jenoktaktsübaji khenyongi magizüktettsüla aser kiralongrartemji ozüng matsüngdangi anir arutsüla, ta ashi.
“Pakistan-i, parnoki kiralongrar network tem raksatsütsü atema süoki ia inyaker ta sayutettsüla,” ta Obama-i PTI dang interview ka agidang ashi.
Iba interview mapang Obama-i India-US tesentakatep aser kiralongraba onük den Paris climate change senden nung lemtetba dak sentakba telangzüba aika agüja liasü.
Athankot amakba süen India Ato kilonser Narendra Modi-i Pakistan Ato kilonser Nawaz Sharif den tongtepratepa jembiba atema tenüngsang agüja Obama-i, “Lenir anapronglai tesem nung kiralongraba anema tongtepratepba atema pelar,” ta ashi.
Pathankot amakaba dak sentakba nung Obama-i, “Iba amakba aitsüba nung onoki India den adener, nisung asüba nokdangtsü atema rarar India nunger sepaitem nem akhüm agütsür aser asürtem kibongtem den asüko osang lemsateper,” ta ashi.
“Tesem nung aser alima nung kiralongrartem jenoktaktsübaji khenyongi magizüktettsüla aser kiralongrartemji ozüng matsüngdangi anir arutsüla,” ta US Tir-isa ashi.