Pakistan-i kiralongrar yariba mapatem anentsüla: Venkaiah Naidu

Bengaluru, July 10 (Agencies): Kidanger dang nungi angazüka Jammu & Kashmir nung telungpurtemi timtem adokdaktsür ta shia tanü Centre sorkari Pakistan dang, Pakistani maneni kiralongrartem yarira, ajungshira aser senotsü agi yarira India-i Islamabad den mapatong melenshitsü atema tanaben shisadangtsü, ta shiogo.
Union Information & Broadcasting Minister, M Venkaiah Naidu-i, Islamabad-i tang parnok mapatem ajanga linük ana tesentaktep majungtsü ta angatettsüla, ta ashi.
“Kiralongrartem yariba, ajungshiba, senotsü agi yariba aser training agütsübaji shingaia magizüktettsü. Pakistan-i item mapatem toktsütsüla. Parnoki merangba nung takok mangutsü. Ato kilonser, Modi-i pai Pakistan den külemi inyaksema tangatettep nung tembar kümnüba temaitsü sayuogo. Ajisüaka Pakistan-i maneni item mapa inyakra sorkari mapatong melenshitsü atema shisadangtsü,” ta Naidu-i ashi.
Ano külen tanü Pakistan-i sangdong ka ajanga India-Occupied-Kashmir nung taimaket Kashmiri tem tepsetba atema aitsüba den külemi parnoki, United Nations-i nungita plebiscite agi nungang Kashmir mangatettep ken o bentettsü, ta ashi.
Yakünü security sepaitemi Kashmir nung Hizbul Mujahideen commander, Burhan Wani tepsetba ajanga yashi Kashmir nung longkak aitdang nisung 11 dak tema asüba sülen tanü Pakistan-i iba sangdong agütsüogo.