Pakistan linüki kiralongrartem ajungshia yarir: India

New Delhi, July 21 (Agencies): Kashmir nung nüburtem maneni longkak aita tensa mejungi aliba atema yashi Pakistan linük ‘Black Day’ anogo sangdongba sülen tanü India sorkari, Pakistan-i kiralongrartem ajungshir aser yarir, ta aitsüogo.
July 8, 2016 nü Kashmir nung security sepaitemi Hizbul Mujahideen Commander, Burhan Wani kahsetba sülen nüburtemi Kashmir Valley nung longkak aita sepaitem den raradang nisung 43 asüba den külemi nisung 3400 shi yiruogo.
Yashi Pakistan nunger nisung merirjang aikati yimti balala nung adenshia longkak aita liasü aser sorkar ketdangsertemia pei mapa inyakba tesem nung tekanük nung lisü tanak mesüa ‘Black Day’ munga liasü.
Ministry of External Affairs (MEA)-i, “Tesüiba anogo ana tsüngda Pakistan aser Pakistan Occupied Kashmir (PoK) nung Jammu & Kashmir dak sentakba sangdongtem aser sentongtem alibaji onoki nguogo, aser item sentongtemji kiralongrar tetsüdi Osama bin Laden aser Taliban lenir Akhtar Mansour nunger tepsetba atema Pakistan nung longkak aitertem aser UN-i kiralongrartem, ta sangdonga alirtem leniba nung agi,” ta ashi.
“Onoki maneni Pakistan dang, rara adokdaktsüba aser pusemba, ozü linük nung kiralongraba anenang aser ozü linük telung onüktem nung jangjongba anenang ta ashir,” ta ministry-isa metetdaktsü.
Tanep Lok Sabha nung Union home minister, Rajnath Singh-i, Pakistan-i senotsü agi kiralongraba yariba ajanga India tashi meitdaktsütsü meranger, ta aija liasü.
Lok Sabha nung Jammu & Kashir tensa indang jembidang Rajnath-i, “Pakistan-i India tashi meitdaktsütsü meranger. India nung kiralongraba lira, ibaji senotsü agi yarir, Pakistan ajanga lir,” ta jembia liasü.