Pakistan-i mezüngsüa telungpur anema drone tayimtsü amshir

Islamabad, September 07 (Agencies): Pakistan-i peisasa yangluba nisung memeni anüng nung yimdaktsüba drone tayimtsü tan mezüngsüa amshia Afghanistan arrtsülen atsükba tongti telungpur 3 tashi tepsetba osang ka Pakistan mitkar ketdangsertemi tanü Hombar nü metetdaktsüogo.

“Burraq ta ajaba drone tayimtsüji amshia North Waziristan kübok Shawal valley nung tentetba telungpur tesep ka amak aser idangji tongti telungpur 3 tashi tanü tepsetba osang jangjaogo,” ta Pakistan mitkar otongdar, Major-General Asim Bajwa-i osang jangjashitsü.

Ajisüaka, tanü tepsetertemji shironok lir iba osang tejangjabo tang tashi memetetdaktsüi lir.

Pakistan kübok tribal region nung densemba Waziristan nung Taliban telungpur aser kidangsüa aliba Afghanistan nung tentetba Taliban telungpurtemi tangasa tesep tenteta aliba osang bushiteta lir.

Pakistan lushi telung nung tesep tenteter külen Taliban telungpurtemi arrtsü adena Afghanistan-i ia idakji mapang shia lendong atalokdakja tensa kanga mejungi kümdaktsüba osanga bushiteta lir.

Aji oda, iba maparenji nokdangtsü nükjidong nung United States mitkartemia par drone tayimtsü amshia Pakistan o Afghanistan na arrtsülen tesep tentetba telungpurtem taoba küm 10 shi amakba osang bushitetogo.

Yamaji inyakba ajanga telungpur noklang aika tepsetba osanga jangjaogo.