Pakistan-i oa masayatsü pur rongnung Malinga, Mathews densema lir

Rongjui/September 10, 2019 (Agencies): Sri Lanka cricket team captain Dimuth Karunaratne aser asayar tejen Lasith Malinga o Angelo Mathews nunger densema asayar 10-i taruba Pakistan tour nung shilem magitsü asoshi telemtetba agiogo. Security dak sendakba nung tebilemtsü aliba ajanga parnoki iba telemtetba ya agi, ta Sri lanka cricket board (SLC)-i sangdong ka ajanga metetdaktsü.
Sri Lanka team Pakistan nung oa Sept. 27 nungi Oct. 9 nü tashi nung one-day internationals (ODIs) asem aser Twenty20 asem asayatsü lir aser iba tour atema security dak sendakba nung sensak asemtsü atema board aser asayartem senden ka mena liasü.
2009 küm Lahore nung Sri Lanka team bus telungpur temi maka security trok aser civilian ana ta tepsetba aser asayar trok yirutsüba sülen Pakistan nung tang tashi Test ka danga asaya mali aser taküm mezüngbuba World Test Championship nung shilem ka ama December ita par linük nung iba tatalokba sülen mezüngbuba test asayatsü renemdar.
Sri Lanka nunger asayar tem dang SLC chief security advisor-i linük nung security tensa metetdaktsü aser iba asayamung nung shilem agitsü asoshi parnok nem telemtetba agitsü temelaba agütsü.
“Iba senden ya asayartem nem security tsütsü jenjang balala agiba osang agütsütsü asoshi aser asayartem meshim tsüngda asayartem telemtetba angadangtsü asoshi ayongzüka agiogo,” ta SLC sangdong ka ajanga metetdaktsü.
Pakistan nung oa masayatsü asoshi telemtetba agiba tanga asayartem rongnung Niroshan Dickwella, Kusal Perera, Dhananjaya De Silva, Thisara Perera, Akila Dhananjaya, Suranga Lakmal aser Dinesh Chandimal densema lir. Kasa mapang nung Kusal Mendis yirur aliba ajanga meshim.
Taoba ita SLC aser Pakistan Cricket Board (PCB)-i limited-overs leg tang asayatsü aser October ita asayatsü aliba Test asaya atsülangtsü asoshi telemtetba agi.
2009 küm tatalokba sülen Pakistan nung küm trok tashi international cricket ka danga ayongzüka asayaa mali aser parnok home asayatem ajak United Arab Emirates nung asayaa liasü.