Pakistan-i Taliban telok aridoktsü akhanger: Ghani

Afghanistan yimitiba, Kabul nung ayongba amenba teloktep National Assembly senden nung linük naklu ken adendang Afghanistan Tir, Ashraf Ghani, (Tiyongtsü)-i marakzüi nokdaker shilem agiba noksa nung angur. (Kabul, April 25)

 Islamabad, April 25 (Agencies): Kidangsüa aliba Pakistan sorkari par lushi nung jenoka alir Taliban telungpurtem aridoktsü aser pua alir Taliban züngsemtem ozüngi melaba ama merenshitsü atema Afghanistan sorkar nem amoktsütsü takhangba olen ka Afghanistan Tir, Ashraf Ghani-i tanü, Hombar nü sangoktsüogo.

Tongpang rarabaren anena Afghanistan sorkar den yimjung senden amentsü memulunger Taliban lenirtem anema mitkar tashi amshia, parnok makdoktsü asoshi Pakistan sorkari toaba mapang nangzükba olen ka Ghani-i tanü par parliament teloktep senden nung metetdaktsü.

Yamaji nangzükaka, Taliban teloki Pakistan kübok Peshawar aser Quetta yimti na aser temeket tesemtem nung par tesep tenteta Afghanistan nem lendong bener arutsüba osang bushiteta lir.

“Quadrilateral Coordination Group (QCG) tentet den nangzüktepba ama, Pakistan sorkari Taliban züngsemtemji memerenshitetra, parnok ozüngi melaba ama merenshitsü asoshi Kabul nem amoktsütsü akhanger, ” ta Ghani-i nenshia ashi.

Afghanistan sorkar aser Taliban telungpur na tsüngda yimjung tezüngzüktep agidaktsütsü nükjidong nung Afghanistan, Pakistan, China aser US nungeri aroki lungjemer taküm küm tetenzüklen QCG tentet.

Taliban teloki nisung 70 shi tepsetba den külemi, nisung 350 shi yiruja, Kabul yimtiba nung taoba hopta lendong kanga sashia atalokdaktsüba sülen Ghani-i tanü Taliban telok Pakistan nungi aridoktsü takhangba onükji benoka liasü.