Pakistan-i UN nem Jadhav indang osang metetdaktsütsü

Islamabad/New Delhi, April 16 (Agencies): Pakistan-i India senso, Kulbhushan Jadhav-i telungpur mapatem aser itangitba mapa inyakba indang osang renemdar aser parnoki iba osangji UN aser Islamabad nung aliba bendang linüktem nungi ketdangsertem nem agutsütsü, ta osang angazüker.
Tang renemba osangji tamalen Jadhav-i Field General Court Martial matsüngdang kuli agütsüba aser jembiba otem lir, aser iba nungji pai Karachi aser Balochistan na nung itangitba mapa inyakba densema lir, ta kasa osang ajanga ashi.
Item kuli kakettem nungji Court Martial General-i agütsüba osang aser court nung ken o akaba osangtema lir.
Arishi küm 46, Jadhav anema Pakistan Army Act (PAA) kübok Field General Court Martial (FGCM) ajanga ken o akaba sülen pa nem tasüba temerenshi agutsütsü obendang agütsü. Taoba hopta Army tongti, Gen Qamar Javed Bajwa-i iba osang jangjatsüogo.
“Item kulitemji Islamabad nung aliba ambassador tem nema agütsütsü” ta kasa osang ajanga ashi. Kasa kuli kakettemji United Nations aser International tentet balala nema agütsütsü, ta parnokisa ashi.
Hokolbarnü Indian High Commissioner, Gautam Bambawale-i, Jadhav nem tasüba temerenshi obendang agütsüba anema parnoki mepishitsü, ta ashiba den külemi iba ken o nung Pakistan dang pa aitsüba kulitem aser army court tetuyuba kulitem meshiogo.