Pakistan-i US dang Kashmir tebilemtsü nung yaritsü ashi

Washington, October 20 (Agencies): Pakistan Ato Kilonser Nawaz Sharif aser US Tir Barack Obama na ajurutepa jembishinü masü tsüngta Pakistani US dang India den Kashmir tebilemtsü nung yariang ta asüngdang.

“Pakistan aser India na tsüngta mangatettep tulutibaji Kashmir tebilemtsü ya lir aser ibaji bentettsü asoshi US aser international lok khuret lir,” ta Hombar nü Foreign Secretary Aizaz Ahmad Chaudhry-i ashi.

“Ato Kilonser US-i aoba mapang India den arrtsülen (line of control) tebilemtsütem rasaa jembitsü,” ta Sharif US-i official süa mapuso dang Aizaz Ahmad Chaudhry-i osangbenertem den jembiba mapanga ashi.

Pai, “Pakistan-i India dena kidanger linüktem ajak den teti yimjung aser tangatettep nung liner aser ibaji atema yaküm Delhi nung Narendra Modi Ato Kilonser shimer tenangzükba agiba sentong nung Sharif-a oa dena liasü,” ta ashiba Radio Pakistan ajanga metetdaktsü.

Aji oda süaka iba dak sentakba nung India-i Pakistan nem telangzüba tajung kecha magütsü, ta pai shisem.

Sharif taonung US atongtsü aser anogo asem nü munga tongtibang jembishinü kar akatsü. Obama-i October 22 nü Sharif jaoka senden ka amentsü sentong lir.