Pakistan kübok Balochistan nung nisung 25 pokset

Islamabad, May 12 (Agencies): Hokolbarnü Pakistan kübok Balochistan province nung bomb lendong ka nung Pakistan Senate nung deputy chairman ka tasü nungi jenbuogo.
Bomb ji deputy chairman Maulana Abdul Ghafoor Haideri taküm agitsü atema pokdaktsü saka pa tia kaa tasütsüsa meyiru saka iba lendong nung nisung 25 asü aser 35 shi yurua lir.
Mastung tesem nung Hokolbar anüngdang mosque nung sarasademba sülen Haideri ji tekülem kidangi nungi aodang len tom nung pa amak. Iba mapang bomb jagi pa amenba gari raksa.
Mozükidangi nisung 25 aser teyirur 35 tashi anir aru. Yirua alirtem rongnung 15 bo kanga mejungi lir, ta Mastung Hospital PRO, Malik Jibran-i ashi.
Ano, police ketdangser Abdul Razzaq Cheema-ia nisung 30 nungi 40 shi ka yirua lir, ta ashi.
Deputy chairman Haideri ji Jamiat Ulema-e-Islam Fazal (JUI-F) züngsem ka lir aser tasürtem teimba JUI-F züngsemtem liasü.
“Iba ya deputy chairman taküm agitsü merangba mapa ka liasü. Ni Balochistan nung Chief Secretary den jembiogo aser Haideri ji Quetta-i tayimtsü ajanga anir arutsü tuyuogo” ta Senate Chairman, Raza Rabbani-ia osangbener dang ashi.
“Bomb tesashi ka apok. Ni yirua lir saka tasütsüsabo masü. Tai maket nisung aika asüba atema ni temulung raksar” ta Haideri-i Dunya TV den jembidang ashi.
Balochistan sorkar otongdar, Anwarul Haq Kakar-i ashiba agi, iba ya pei sasa poksetba inyakyim ka liasü saka kuli tejangja mangu lir.
Tesüiba küm ishika Balochistan nung kiralongrar aser telungpurtemi ozüng alema mapa kanga bulua inyaka arur aser Mastung tesem nung sepaitemi kiralongrar aser telungpurtem anema kanga sashia mapa inyaker.