Pakistan kübok Gilgit-Baltistan nung tetsür 12 rongset

Karachi/Islamabad, Luroi/August 03 (Agencies): Pakistan kübok Gilgit-Baltistan nung mejangjaba telungpurtemi school ki 12 (tesadang kabo tetsür temeja azüngba school) amakba lendong nung school azünger tetsür 12 rongsetogo; iba sülen lisopurtemi shisaliok rejutem kümzüka ayutsü atema takhangba agüja longkak ait, ta tanü ketdangsertem osang ka ajanga metetdaktsü.
Gilgit nungi kilometer 130 shi pilar aliba Chilas jila nung school temji yasüng (Yangtepnü) ayaterm nung telungpurtemi mi senoka rongdoktsü, aser Diamer district nung aliba school tem nung kiojen raksatsü, ta police-i metetdaktsü.
Osangbenertem den jembidang Superintendent of Police Diamer, Roy Ajmal-i, telungpurtem jagi school 12 amakba sülena jena ao, ta metetdaktsü.
“Police-i bushisüngdang tenzükogo aser security sepaiatemi aiabelenertemji bushi tenzükogo,” ta pai ashi.
Commissioner Diamer region, Abdul Waheed Shah-i, tang tashi nungbo bomb amshia amakba kuli mangur, ta ashi.
Ketdangsertemi ashiba agi, telungpurtemi amakba school tem rongnung karbo tang teyanglushidak liasü.
Yasüng school tem amakba sülen yangji aliaba lisopurtemi Siddique Akbar Chowk nung adenshia aibalenertem aputsü aser kaket rejutem kümzüka ayutsü atema takhangba agüja longkak aitogo.
Tang tashi nungbo telungpur telok shingaia tenüng agia mali, ajisüaka Taliban telungpuremi tamalen north-western Pakistan nung school noklang aika maakogo, anungji parnok dak mulung malemer.
Pakistan nung school tem, talisa tetsür temejang azüngba school tem amaker. 2011 küm Luchii/December ita nunga Chilas jila nungsa tetsür temeja azüngba school ana bomb amshia maaka liasü.
Ano 2010 küm nunga mejangjaba telungpaurtemi tetsür temeja azüngba school ama amak.
2017 küm Human Rights Watch (HRW) report ajanga ashiba agi, Pakistan nung Taliban aser tanga telok balalai tetsür temeja azüngba school tem dak tenük yoka amaker.