Pakistan lenir den ajurutsü renema lir :Trump

Washington, Metsüremi/March 23 (Agencies): Afghanistan nung rara tembangdaktsütsü nükjidong nung Islamabad-i teyari agüja US aser Taliban na tsüngda yimjung asoshi ken o jembishinüba mapang ka nung US tir Donald Trump-i Pakistan nung lenir tasentem den ajuruteptsü asoshi renema aliba sayuogo.
Taoba küm Islamabad-i osang teyazü dak alaka kecha magütsür aser kiralongrartem nem tejenokdak agütsür ta shia Trump-i Pakistan aitsüba sülen linük ana tsüngda tensendaktep tamajungba aküm.
Pakistan-i kiralongraba telok Haqqani Network aser Taliban anema jenjang peria magir ta shia September ita Trump administration-i Islamabad nem military teyari agüja aliba nungi USD million 300 agintsü.
Trump-isa November ita Twitter nung Pakistan aija liasü. Pai ashiba agi Pakistan-i kiralongrartem inyaksangshi nokdangtsü asoshi mapa peria minyaker.
Bodhbarnü White House nung osangbentem den sensaksem tatembanglen osangbener kati India aser Pakistan na tsüngda tensa dak sendakba nung paia kechi bilemer ta asüngdangba mapang Trump-i Pakistan Ato Kilonser Imran Khan den ajuruteptsü akok ta asüba osang ya ajungbena metetdakja liasü.
“Onok Pakistan den ajuruteptsü. Pakistan den asenok tesendaktep tang kanga junga lir ta bilemer,” ta Trump-i White House toktsür Ohio-i mao tsüngda ashi.
Pakistan teyari nung US envoy Zalmay Khalilzad lenisüba kübok Taliban den yimjung yanglutsü asoshi jembishinüa arudar.
Khalilzad shiba Afghanistan Reconciliation atema Special Representative lir, pai ashiba agi, Afghan yimjung ken o jembiba nung Pakistan-i tongtibang shilem ka agitsü lir aser parnok nemja mebilemtsüla, ta pai ashiba state meyong Radio Pakistan ajanga metetdaktsü.
Pakistan-i Tir Trump aser Ato Kilonser Khan na senden ka akatsü asoshi merangdanga arudar aser iba senden melena Islamabad-i yimjung ken o sensaksemtsü atema Talibanpur anir arutsü. Cricket asayar aliba nung politician akümsang yagi Pakistan Ato Kilonser menden taoba küm August ita belenzük.
Afghan Taliban, US aser Pakistan o Saudi Arabia nungi ketdangsertem Doha, Qatar nung ajurutepa arudar. Iba sensaksem ya Pakistan teyari nung agia arudar, koba ajanga Afghanistan nung küm 18 rara anendaktsütsü meranger, kong US nunger sepai 2,000 dak tema tepsetogo.
Tang Afghanistan nung US nunger sepai 14,000 yoka lir. Hokolbarnü meita aoba mapang Afghanistan nung US sepai ana khasetogo, ta Fox News sangdong ka ajanga metetdaktsü.
Hokolbarnü sepai ana tepsetba ya January ita nungi tang tashi nung mezüngbuba tasüba atalokba asütsü. Taoba küm America nunger sepai 13 süogo.
Pulwama nung kiralongrartemi CRPF sepai 40 tashi tepsetba sülen küm ter tsüngda India aser Pakistan tsüngda tensa kanga mejungi aliba dak sendakba nung US-i maneni kanga shisabulua bilemer ta ketdangser tejen kati ashiba sülen ghonda ishika lir Tir Trump-i Pa Pakistan nunger lenirtem den ajuruteptsü asoshi renema aliba temaitsü sayuogo.
Pakistan nung amendaker aliba kiralongrar Jaish-e-Mohammed (JeM) puri Jammu and Kashmir kübok Pulwama district nung February 14 nü CRPF sepai 40 tepsetba sülen India aser Pakistan na tsüngda tensa tamajungba aküm.
Iba sülen India-i Balakot amak aser tasüngnü Pakistan Air Force-ia meyiper amak aser anüng nung khatepba mapang MiG-21 ka khazüka yok aser polit apu, shiba India nem March 1 nü meyipa agüja liasü.
US ketdangserisa, kiralongrar temi India ano khendanga makra Pakistan asoshi tebilemtsü tulu asütsü aser iba ajanga tensa tamajungba kümdaktsütsü ta tekümdangtsü metetdaktsüogo.
“Iba tesem nung tensa tamajungba küma meyoktsü atema Pakistan-i kiralongrartem talisa Jaish-e-Mohammed aser Lashkar-e-Taiba anema jenjang tapet agiba metetdaktsütsüla,” ta ketdangseri ashi.
“Pakistan-i item teloktem anema jenjang tapet magi-i kiralongrartemi India anosa makra iba ajanga tensa tamajungba kümdaktsütsü aser Pakistan asoshi tebilemtsü tulu bener arutsütsü, koba linük anaprongla asoshi kanga lendong lir,” ta ketdangser-i ashi.