Pakistan local body election nung 12 asü, 16 yiru

Karachi, November 01 (Agencies): Pakistan nung aliba Punjab aser Sindh province tem nung local body election agiba mapang telok balala tsüngda raratepba lendong nung tajemba agi nisung 12 asü aser 16 yiru.
District 20 nung polling asemben lemdanger agitsü aliba province ana tesem kar nung iba lendong ya atalaok.
“Telok balala nungi prangpong amshia raratepba ya Khairpur nung aliba Daraza Sharif Union Council nung ataloka liasü,” ta police officer Pir Muhammad Shah-i ashi.
Iba rara ya Pakistan Peoples Party (PPP) o Pakistan Muslim League functional (PML F) telok na tsüngda adok. Parnok ya Junejo kin nungi lir.
Pai ashiba agi, injang agi kahtepa raraba ajanga nisung 12 asü aser 16 tashi yiru. Teyirurtemji mozü kidang anir oa yaridar.
PML-F teloki ashiba agi, Sanghar district nung alir, PPP pusemer temi injang akahba ajanga par telok nung tongti nisung trok kahsetogo.
Iba den külemi ano Pakistan Muslims League-Nawaz PML-N) aser Pakistan Tehreek-e-Insaaf pusemer tema raratepa liasü.
Punjab sorkar nung otongdar Zaim Qadri-i, lendong agütsür nisung 200 pua lir, ta metetdaktsüogo.
Osang kar ajanga ashiba agi, Punjab nung seat 2,696 nungi PML-N party-i seat 532 nguteta lir aser iba sülen Pakistan Tehreek-i-Insaf party-i constituency 80 nung takok nguteta lir.
Sindh nung, seat 1,072 nungi PPP-i 564 aser Muslim League-Functional-i seat 50 nguteta lir, ta kasa osang ajangasa ashi.