Pakistan northwest nung nisung 36 asü, 27 shi yiru

Pakistan anüdoklentip tsütsülen, Peshawar yimti tezülen tentetba shishilembadak ka tzü agi metsüngbangba noksa nung angur. (Peshawar, April 03)

Peshawar, April 03 (Agencies): Pakistan northwest tsütsülen densemba tesemtem nung tzünglu kanga sashia aruba ajanga tzümetsüng aser anentsü lendong bener arutsüba osang ka sorkar ketdangsertemi tanü, Deobar nü metetdaktsüogo.
Yasüng, Honibar aonung nungi tenzüka Khyber Pakhtunkhwa province nung tzünglu kanga sashia aruba ajanga bener arutsüba lendong balala nung ishiba agi nisung 36 asüba aser nisung 27 shi yiruba osang tang tashi nung jangjaogo ta provincial disaster management agency otongdari osang jangjashitsü.
“Province tezülen tentetba tesemtem nung nisung asüba aser yiruba osangbo tang tashi mejangjateti lir,” ta shia, tan lendong nung nisung asüba aser yiruba osangji tang dang nungi timba akümtsü akok ta otongdasangi ashi.
Tan lendong tesashitibaji Kohistan nung atalok aser iba tesem nung nisung 12 tashi asüba osang jangjaogo.
Kohistan sülen anidaka, Shangla district nung atalokba anentsü lendong nunga nisung 10 tashi asüba osang tang tashi nung jangjaogo.
Pakistan nung kümshi iba mapang nung tzünglu kanga sashia aruba ajanga nisung yirua asüba aser alimang jenti raksaba osang bushiteta lir.
Yaküm, 2015 küma tzünglu kanga sashia aruba ajanga bener arutsüba anentsü aser tzümetsüng lendong nung nisung 81 shi asüba aser nisung 300,000 shi nem timtem jenti bener arutsüba osang bushitetogo.